No.6863/2020-2021
Vawiin hian Serchhip DC Meeting Hall ah Serchhip District Level Task Force on Covid19 Vaccination te chu an Chairman Pu Kumar Abhishek, IAS, DC hovin an thukhawm a. Covid19 Vaccine a taka pek chhuah theih a nih huna vaccine pek hmasak tur ruahmanna te, district puma vaccine sem a nih huna mamawh turte sawi hona an nei.
Pu Kumar Abhishek chuan, tunah Mizoramah Covid19 vaccine la hmu chiah lo mah ila kan hmuh theih huna district chhunga a dawng hmasa turte sawrkar laipui leh state duh danin kan lo inruahman fel hmasa a, Serchhip district pawh a dawng hmasa tur list thehlut hmasa ber te zinga mi kan ni, a ti a. Tin, vaccine phurh kualna turte, a dahna turte, thawktute a tul anga training lo pekte leh mamawh dang awm thei apiang ngaihtuah lawka kan awm a tul a, thuneitu sang zawk atanga a kalpui dan tur thuchhuak zulzui zela vaccine pek dan tur hmalakna thawk turin he Task Force hi din a ni, a ti.
Dr. Lalhlunpuii, District Immunization Officer (DIO), Member Secretary chuan report tlangpui a pe a, Serchhip District chhungah Vaccine dah lailawk theihna (facilities) Hospital leh PHC te 10 an awm mek thu leh heng zinga pakhat Mercy Private Hospital tih loh chuan a phurh sawnna tur Bawm (box) an neih vek thu a tarlanga, Vaccine pek chhuah theihna Centre 35 a awm thu leh District Hospital ah a chhekkhawla (District Vaccine Store) a awm thu tarlang bawk.
Vawiin hi he Task Force thutkhawm tum khatna a ni a, state level authority in tih tur an ruahman hrang hrang te en hovin hmalak zui ngaite an sawi ho a ni.
He meeting ah hian Pu R. Sathiyasundaram, IPS, SP, Serchhip, Pu Lalmuansanga Ralte, MCS, Addl. DC, Dr. Laldawngliana Sailo, CMO & Responsible Officer bakah member dangte an tel a ni.
