No.6864/2020-2021

Vawiin khan Lawngtlai District Task Force Immunisation (DTFI) chu an Chairman, Lawngtlai Bawrhsap Dr Andrew H. Vanlaldika hovin DC Conference Hall-ah an thu khawm a. Sawrkar laipui ruahmanna anga COVID-19 hri danna (vaccine) peih fel a nih huna pek hmasak tur, hriselna lama thawktu (health care worker)-te hnena hri danna pek dan tur ruahmanna an sawi ho.

He thut khawmah hian Lawngtlai Chief Medical Officer Dr LC Liana bakah, health department leh ICDS lam official-te an tel a. Chairman, Dr Andrew H. Vanlaldika chuan COVID-19 hri leng dona kawngah Lawngtlai District chhunga health department hnuaia thawktute an thawh rimnaah fakin, District mipuite him nana theih tawp chhuah zel turin a fuih a. COVID-19 hri danna peih fel a ni dawn hnaia lang chu lawmawm a tih thu sawiin, hri danna a awm hma chu fimkhurna dan hrang hrang zawm zui zel a pawimawh, a ti a, hriselna chu man tam tak a nih avangin, hri danna hman theih a nih hnuah pawh inthlahdah phah chuang loh tur a ni, a ti.

Member Secretary, District Immunisation Officer Dr S. Thaizi chuan COVID-19 hri danna chungchang leh sawrkar laipui atanga ruahmanna awm te a sawi fiah a. Vaccine chu hman theiha peih fel a nih chuan health care worker (doctor, nurse, health worker, ASHA leh anganwadi worker & helper)-te pek hmasak tura ruahmanna a awm thu sawiin, January 2021 thla tawp lamah chuan pek theih beisei a nih thu a sawi a. Thawktute hming pawh lak khawm a, theh luh fel vek tawh niin, Mizoram chu India rama a tizo hmasa pawl a nih thu a sawi.