1017/2024-2025

Champhai, 1st July 2024: Vawiin khan Govt. Vengthlang Middle School, Champhaiah thla hnih awh tur kawthalo venna beihpui – ‘Stop Diarrhoea Campaign’ khuhhawnna neih a ni a. Champhai Bawrhsap Pu James Lalrinchhana chuan khuallian niin a hmanpui.

Stop Diarrhoea Campaign 2024-in a tum ber chu kawthalo vanga naupang boral an awm tawh loh nana hmalak a ni a. Kumin atang hian hun hmasa lam a kawthalo dona beihpui thlak dan chu tihdanglam niin, kar hnih awh ‘Intensified Diarrhoea Control Fortnight’ chu thla hnih chhung awh tur ‘Stop Diarrhoea Campaign’ hmanga thlak a ni. He campaign hnuaiah hian sawrkar department hrang hrang – Rural Development, Urban Development, School Education, Women & Child Development leh Public Health Engineering te bakah tlawmngai pawl te thawkhoin, kawthalo enkawl leh inven dan te zau zawka inzirtirna kalpui a ni dawn a ni.

Khuallian Pu James Lalrinchhana chuan Govt. Vengthlang Middle School hmunhma bakah zirlai naupangte faina leh thianghlimna chu lawmawm a tih thu a sawi a. District hmasawnna chu zirnaah a innghat a, hei vang hian zirna hi hlamchhiah a thiang lo a ni, a ti. Zirlaite chu ram innghahna, ram hruaitu tur an ni tih hre reng tura chahin, vawiina zirtirna an dawn te hre reng tur leh tangkai taka hmang chhuak thiam turin a fuih bawk a ni.

Champhai Bawrhsap chuan kum 2019 thleng khan kawthalo chu naupang kum 5 hnuai lam thihna thlen hnem ber dawttu a ni a, kum 2024 January-ah pawh thihna thlen hnem kawngah pathumna a la ni a, hei vang hian kawthalo dona kawngah chak zawka hmalak leh tan rual a tul hle a ni, a ti. Zirlai naupang kalkhawmte chu Stop Diarrhoea Campaign puala kut sil fai dan leh  kawthalo enkawl dan an zir te chu an nu leh pa bakah an thiante hnenah zirtir chhawng ve zel turin a chah a ni.

Stop Diarrhoea Campaign hawnna hun hi Dr. PC Lalhmingliana, Sr. CMO chuan a kaihruai a. Dr Vanzarliani, Dy. CMO in Campaign chungchang sawi hawnna hun hmangin, Pi C. Lalramengi, DPM chuan Presentation hmangin Stop Diarrhoea Campaign chungchang sawi zauna hun a nei bawk. Hei bakah hian Line Department hrang hrang - RD, UD&PA, DEO, W&CD leh Sub Hqrs MHIP te hnen atangin thu sawi ngaihthlak a ni bawk a ni.