1016/2024-2025

Mamit 1st July, 2024 : Vawiin khan SP Conference Hall, Mamit-ah New Criminal laws tlangzarhna leh zirchianna hun hman a ni.

Pi Lalthangpuii Pulamte, SP Mamit chuan kum 1968 atanga dan kan lo hman tawh thlaka dan thar kan hman tur ni hi ni chhinchhiahtlak tak a ni a ti. Dan chuan kan dikna chanvo min hriattir a, dan hriatna chuan inrintawkna min pein, danin min phuar thei ang bawkin dan hmang veka phelh theih kan nihna te hi kan inhriatchian a ngai a, India ram puma mipui te min phuara min khalhkhawmtu tur dan hi Central Home Minister hova vawi 100 chuang teh meuh ennawn a nih hnuah hman theih a ni ta chu a lawmawm hle a, kan hriat tur chin tal te zirchiang turin kalkhawmte a sawm a ni.

SI. RS Lalchungnunga, OC Mamit PS chuan India rampuma criminal laws Pathum kan hman thar turte Bharatiya Nyaya Sanhita (BNS) - 2023, Bharatiya Nagarik Suraksha (BNSS) - 2023 leh Bharatiya Sakshya Adhinyam (BSA) - 2023 sawizauna a nei a, dan thar kan hman tura mipui vantlang te'n kan hriat atana pawimawh bikte a tarlang a, dan bawhchhiate hremna hrang hrang chipchiar takin a tarlang bawk a ni.

Pu Lalpianthanga, MPS Addl.SP pawhin khawtlang hruaitute, tlawmngaipawl aiawhte chu dan leh thupek kenkawh kawngah leh dan bawhchhia man chhuah kawngah police-te tha tichaka thawhho puiah a sawm a ni.

Kalkhawmte atangin new Criminal laws chungchanga rawtna te, zawhna te neih zui a ni.

He hun hi Pu Zosangliana MPS, SDPO, Mamit chuan kaihruaiin, ASI. HV Thansanga'n lawmthusawina a nei bawk. 

He hunah hian tlawmngaipawl aiawh, khawtlang hruaitu, thutharthehdarhtute leh sawmbikte an tel a ni.