Vawiin chawhma khan Champhai Bawrhsap thar Pu S.L Naveen, IAS chuan a Pisa-ah Champhai District MJA Member-te lengah sawmin inkawmhona  hun a neihpui.

Bawrhsap Pu S.L Naveen chuan Sawrkar thuchhuak leh hmalakna hrang hrangte mipuite’n an hriat  zel theihna turin Chanchinbumite tawiawmna a ngen a. Sawrkar chu amah maia kal thei anih loh thu sawiin, Media, NGO leh district mipuite puihna leh tawiawmna a mamawh fo a ni, a ti a. Chanchinbumite chu sawrkarin a mawmawh  leh puih a ngaih hun pawha biakpawha banphak maia awm thin turin a chah nghal bawk a ni.

MJA Champhai District member-te chuan Champhai Bawrhsap tharin a hun remchang neih hmasa berah Chanchinbumite ngaipawimawha inlenga a sawnm chu lawmthu sawiin, inpawhtlang taka thawhhona tha tak neih an beisei thu leh Champhai District atana hriatreng tlak hnutchhiah ngei tum tura chahin, ram leh hnam tana rawngbawl kawngah tha taka tawiawma a phena an din tlat dawn thu an sawi bawk a ni.

He hunah hian inhmelhriattirna hun neih hmasak niin, district mamawh leh hmalak ngaihna hrang hrangte chipchiar taka sawiho  a ni a. Chanchinbumite’n khawtlang inrelbawlna leh hmasawnna kawnga khawtlang mamawh leh tul hrang hrangte Bawrhsap hnenah hian thlenin, Bawrhsap pawhin dan tlawhchhana a tul ang zela hmachhawpte bawhzui anih tur thu a sawi a. Chanchinbumite chu mipuite hnena sawrkar thuchhuak thlentu pawimawh tak an nih angin khawtlang tana pawimawh rela thutkhawmnaahte a tam thei ang ber an tel theih dan turte sawiho a ni a. MJA Champhai District member-te chuan inkalpawhna khan hrang hrang chhawr tangkaia ramri kaltlanga ruihhlo leh a kaihhnawih dan lo anga lut thin an vei thu leh dan beh tlat anih theihna tura  dan kengkawhtu lam inthuamthat angaih thute an thlen a. Vantlang kawngpui dip zawnga insakna bungrua leh hmanruate dah ani thin leh Ui leh Ar  thlah zalen lutuk an vei thute thlenin, thupek mai nilo a taka bawhzui anih ngei theihna tura hmala  turin an ngen a ni. Road Protection Squad tharthawh leh a hun takzet thu  pawh he hunah hian tarlan a ni a. Department hrang hrangte’n mipuite hriat tur pawimawh scheme leh programme an kalpui thinahte leh hun bik ni pawimawhahte Chanchinbu leh Cable TV kaltlanga Advertisement pek thin nise tih an thlen bawk a. Chanchibumite chuan Bawrhsap hnenah hian khawpui tawt lutuk an ngaihmawh thu pawh thlenin, Lirthei dahna In mumal neilo leh khawpui chhung lun laia lirthei rei tak tak hun thin an vei thute pawh an thlen a. Krismas leh kumthar hunpui lo thleng tur ralmuang taka hman anih theihna tur leh Champhai leh a chhehvela sawrkar hmalakna lian tak taka hnathawh muang lutuk vanga harsatna awm theite pawh tarlangin,  hengte hi Bawrhsap chu lo enzuia a tul anga hma la turin an ngen nghal bawk a ni.

Bawrhsap hi Pu V. Alexander V.Chongthu, Addl DC;  Pu Zoremthara Ralte, SDO Sadar leh Dr. Lallawmkima, DIPRO ten an tawiawm a. MJA lam hi an President Pu C.Lalhnunpuia’n a ho a ni.