Ni 18.11.2019 (Thawhtanni) khan Sipai Lak Runpui, Indian Army Rally 2019 chu Mualpui, Aizawlah neih tan a ni ta a; Dr Vanlaltanpuia, Chairman, Mizoram Youth Commission (MYC) chuan ni 18.11.2019 zing kar khan he Sipai Lak Runpui tanna hun hi hmanpuiin, Army Rally hi a flag off a, candidate tel zawng zawng duhsakna a hlan ni.
 
MYC Chairman Dr Vanlaltanpuia chuan, “Tuna Indian Army lak tur hna hrang hrang hi Mizoram thalaite tan pawha hna nghet leh hna tha tak a nih avangin MYC chuan a ngai pawimawh hle a; hemi atana Mizoram thalaite an tlin tam theih nan tiin MYC chuan kum 2019-ah pawh hian Assam Rifles nen thawk hoin Aizawl, Lunglei, Saihaah leh Vairengteah CIJWS nen thawk dunin Indian Army Pre-Recruitment Training a thlawnin kan buatsaih a, thalai mi 600 chuangin an lo zawm a, Mizoram tana post ruak zat hnawh khah vek a nih theih nan MYC chuan theihtawp kan chhuah a ni,” a ti.

Aizawla Sipai Lak Runpui - Indian Army Rally 2019 atan hian Mizo thalai mi 2753-in online registration an ti a, ni 18.11.2019-ah Aizawl District leh ni 19.11.2019-ah Aizawl District lo zawng tan Physical Test neih a ni ang a; heta tlingte hi ni 22.11.2019-ah Medical Test neih zawh fel a ni ang a, chuta tlingte chuan ni 19.1.2020-ah Written Test an nei leh dawn a ni.