Mizoram Police Media cell, PHQ chuan hetiang hian thuchhuah a siam :-

Tunlai hian State Bank of India hriatpuina leh phalna tel lovin Mizo Overseas Employment Agencies, Upper khatla, Aizawl, Mizoram hnuaiah SBI Mutual Fund hming hmangin mi engemaw zat bum an ni a. He inbumna kaihhnawihah hian Aizawl Police Station ah Criminal Case siam niin a inhnamhnawih nia hriat mi thenkhat man an ni tawh bawk. He inbumna hi uluk taka chhui mek a ni a, pawisa lo dah ve (depositor) engemaw zat hriat chhuah tawh an ni bawk.

Mizo Overseas Employment Agencies hnuaia SBI Mutual Fund hminga pawisa lo dah (deposit) zawng zawngte Officer in Charge, Aizawl Police Station, Aizawl hnenah customer certificate leh lehkha pawimawh dangte nena hriattir turin Mizoram Police chuan a ngen a. Tin, hetiang inbumna laka fimkhur turin mipuite a ngen bawk a ni.