4503/2024-2025

Champhai, 1st March 2025: Champhai Bawrhsap thar tura ruat Pu Mohammed Aaquib, IAS chuan nimin (February ni 28, 2025) tlai dar 04:30 khan Bawrhsap kalchhuak tur Pu VL Remliana hnen aṭangin mawhphurhna a la a. Pu VL Remliana hian Secretary, State Election Commission hna chelh turin Aizawl a pan thung dawn a ni.

He hunah hian Bawrhsap kalchhuak Pu VL Remliana chuan Bawrhsap anih chhunga sawrkar hnathawk, khawtlang leh tlawmngai pawl hruaitute bakah District mipui ten an thlawp ṭhin na ah lawmthu a sawi a. A chunga ṭhatna an lan tir angin Bawrhsap thar chunga pawh ṭhat chhuah a, theihtawp chhuaha lo thawhpui turin mi zawng zawng a ngen bawk a ni.

Bawrhsap thar Pu Mohammed Aaquib pawhin he hunah hian thu sawiin Champhai District hmasawnna tura thawhpuiah mi zawng zawng a sawm a. Champhai khawpui faina kawngah theihtawp chhuah a tum thu te;  hriselna leh zirna kawnga hmasawnna turin CSR fund a tam thei ang ber hai luh a duh thu a sawi bawk a ni.

Pu Mohammed Aaquib hi kum 2021 Batch IAS niin, Sant Kisan Nagar District, Uttar Pradesh chhuak a ni a. IIT Madras aṭangin kum 2017 khan B.Tech (Mechanical Engineering) zir zovin, kum 2020 khan IPS a inziak tling a. Kum 2021 khan IAS ah a inziak tling leh a, Probation period a hman chhungin Mizoram hmun hrang hrang - Aizawl, Serchhip, Thenzawl leh Kawnpuiah te mawhphurhna hrang hrang chelhin a lo awm tawh a ni.