4502/2024-2025

Lawngtlai, 1st March 2025 : Vawiin khan Dr. Lorrain Lalpekliana Chinzah, Adviser to Chief Minister leh Lawngtlai East bialtu MLA nibawk chuan CYLA Playground, Chandmary, Lawngtlaia Hlukhla Kût 2025 hman mek chu a hmunah kalin a hmanpui.

Dr. Lorrain Lalpekliana Chinzah, chuan Hlukhla chhim tura lo kalte leh Organising Committee - te chunga lawmthu sawina a nei hmasa a. Hnam ziaranga harhtharna chan a tul thu sawiin,  hnam leh nihna a chiang thar  turin kalkhawmte a sawm a. A bik takin hnam inthuamna leh  tawng lamah harh thar a tul hle a ti.  MLA chuan mahni nihna hriatchian a pawimawh thu tarlangin, chhungkua, khawtlang leh ram siam tha tura  mahni  nihnna a  chian hmasak a, hma lam pan zel tura mahni intiam turin kalkhawmte a sawm a. Pi leh pute rohlu- nun zemawi, rinawmna leh taihmakna chu vawng nung zel turin a chah bawk.

Zirthiamna lama tan lak a tul thu sawiin Adviser to Chief chuan chuan thiamna sang zawk nei turin theihtawp  chhuahin i thawk ang u tiin a sawm a. Ziak leh chhiara  hniam lam pan a hlauhawm thu  sawiin, hnam anga theihtawp chhuah a tul a ni, a ti. Hnam ziarang leh kalphungte ziaka dah thlap thlap thin hnam an boral ngai lo tiin MLA chuan Lai hnam ziarang leh tihphungte pawh ziaka vawn that reng a tul a, Laifate chu mawhphurhna la ngam turin a chah.

Dr. Lorrain Lalpekliana Chinzah chuan khawltangah  inlungrualna, induhsakna leh inhmangaihna a awm a tul hle a ti a. Khawtlang enkawltu VC leh Tlawmngai Pawl hrang hrangte pawh tun aia nasa zawka ram leh hnam tana thawk turin a chah a. Mipuite pawh khawtlang enkawltute hlut  leh zah  kawngah hmasawn turin a sawm a. MLA chuan khawvel hmasawnna leh changkanna in rilru put hmang nasa takin a  tidanglam mek tih tarlangin, hetiang karah pawh Pi leh puten nunzemawi tak tak min hnutchhiahte  vawng nung zel ang u tiin a sawm a. Inpumkhatna a awm loh chuan hmasawnna a awm thei lo tih tarlangin, Dr. Lorrain Lalpeklian Chinzah chuan Zohnahthlak hnam hrang hrangte inkarah inlungrualna awm tura  theih tawp chhuah tura sawmin, hlim leh hlawk  taka Hlukhla hmang turin duhsakna sang ber a hlan nghal bawk.

Hlukhla hi Laifate Kût lian leh ngaihhlut  ber niin kum tin hman thin a ni a, kuminah chuan  ni hnih  ( 28th February - 1st March) chhung hman a ni a. Hlukhla Kùt hmannaah hian hnam lam chi hrang hrang, hnam incheina leh   hnam infiamna te  entir niin, zaithiamte nen hun hlimawm tak hman a ni.