1065/2024-2025

Champhai, 4th July 2024: Sawrkar Laipui Ministry of Information & Broadcasting hnuaia cheng nuai 100 senga din ‘Experiential Learning Centre (ELC)’ chu vawiin chawhma dar 10:00 khan Champhai Bawrhsap Pu James Lalrinchhana chuan CHANEM Building, Champhai Vengthlangah a hawng. ELC hi Mizorama hmasa ber a ni a, hmarchhakah pawh Sikkim leh Manipur-te chiahin an la nei a ni.

ELC hawngtu Pu James Lalrinchhana chuan  Champhai District Bawrhsap a nih chhungin District hmasawnna a tan ruahmanna tam tak siam a nih thu sawiin, Champhai District chhunga hmasawnna hrang hrang he hunah hian a tarlang a. Vawiina hawn tak ELC bakah Champhai District Hospital-ah ICU khawl hrang hrang nuai 40 man bun fel a nih tawh thu te, Hmunhmeltha -Zote Road thawmthat a nih thu te, School pahnihah Computer 10 ve ve bun tum a nih thu te leh Ministry of I&B te nena thawkhovin Champhai District-a khua zawng zawngah naupang tan film chhuaha HIV/AIDS leh Drugs Awareness Campaign neih tum a nih thu te a sawi a ni. He tih rual hian MLA leh MP Inthlanpui ten hnathawhna hun tam tak an lak hek avangin duh anga hmalak chak a ni thei lo erawh pawi a tih thu khuallian hian a sawi a, Experiential Learning Centre (ELC) tluang taka hawn a ni ta erawh chu lawmawm a tih thu a sawi bawk a ni.

Pu James Lalrinchhana chuan ELC chu zir thiamna hmun ‘Educational Centre’ a nihna ngaipawimawh turin mipuite a ngen a. ELC chu zirlai naupangte thiamna inthukru phochhuaktu, ram enkawl leh thil ruahman an thiam phah theihna leh thiamna tak tak pe chhuaktu ni thei se tia duhsakna hlanin ELC Centre hi a hawng a ni.

Champhai Bawrhsap chuan Experiential Learning Centre din a nih theih nana hmalatu Pu Armstrong Pame, IAS, Director, Film Division, Ministry of I&B chungah te, ELC Management Committee member chungah te, ELC Nodal Officer  Pu Moses Lalfakawma Tlau leh hawnna inkhawma kalkhawm zawng zawng te chungah lawmthu a sawi a ni.

ELC hawnna inkhawm hi Pu K. Zorammuana, Addl DC chuan kaihruaiin kalkhawmte inlawmna thu a sawi a. Pu Benjamin Zalawma Ralte, DUDO chuan technical report a pe a. ELC din tur hian August ni 7, 2023 atanga hmalak tan a ni a. ELC-ah hian Artificial Intelligence leh Virtual Reality hmang ‘Gaming Zone’ te, ‘HoloWorld’ leh video fiah zawk (High Definition) hmanga thil awm dan inhrilhfiahna hmun ‘Viewing Room’ te a awm a ni. ELC din nan hian  Ministry of I&B atangin cheng nuai 100 hmuh a ni a, a hmunhma chei that nan leh khawl bun fel nan cheng nuai  92.39 (₹ 92,39,797) sen tawh a ni a. Pawisa hman ban cheng nuai 7.6 (₹7,60,203) pawh hi ELC tihchangtlun nana hman leh turin ruahman a ni.

Hawnna inkhawmah hian pawl hrang hrang aiawh te pawhin thu an sawi a, he mi hnu hian Experiential Session hlimawm leh hlawk thlak tak neih a ni.