Nizan khan Champhai Bethel Veng mipuiten an  sum thawhkhawm atanga veng chhung hmun hrang hrang ti engtu tur Mini High Mast an siamte chu Transport Minister Pu TJ Lalnuntluanga, Champhai South bialtu MLA nibawk  chuan chhawr tangkai theih turin  a hawng.

Minister chuan suahsualna zalen hun zan  thimtham venna tur leh mipuite thlamuang  taka an awm theihna tura khawtlang tangrualin  veng chhung hmun thenkhatah eng tha tak an pe chhuak thei chu lawmawm a tih thu a sawi a. Mihringte nunphungah eng a pawimawh em em a, High Mast chu khawpui thang leh changkang zel mamawh ani tih hriain Champhai Town Planning leh Master Plan siamahte ngaipawimawh a ni, a ti a.  Changkanna leh hmasawnna ken tel suahsualna pung zelah  sual  zalen hun zan khawthim umbo turin veng chhung tih  en  chhuah  vek a tul tawh thu a sawi a. Bethel  khawtlang tangrualin Sawrkar pawt buailo a  eng tha tak leh veng chhung hnawmhnawk paih tur Lirthei tha tak a sualchhuak thei chuan veng mipuite inlungrual zia a lantir a ni, a ti a. Champhai South bialtu MLA  chuan Bethel  khawtlang chu Zoram hmun hrang hrangte  entawn nih tum zel turin  a fuih  a, Mini High Mast hawn thar takte chuan  veng chhungah muanna leh  malsawma a thlen ngei a  beisei thu sawiin a hawng a ni.

He hun hi Pu K.Lalrawna Bethel VCP chuan a kaihruai a. Pu PC Lalchuangkima hnen atangin report ngaihthlak a ni a. C.Laitanga, VC Membber-in inhmelhriattirna a nei a. Pu Lalhriatpuia, YMA President-in lawmthu sawiin hun a khar a ni.

Nizana hawn tak  Bethel Mini High Mast-te hi veng chhung hmun hrang  hrang panga a mite an ni a. Upper Bethel Tower, Bethel Kawn Tower, YMA Square Tower,  Bethel Lane Hnuai Tower leh YMA In kawn Tower-te an ni. Tower te hi feet 30 a sang 2 leh feet 41 a sang 3 te niin, Eng Watt 640 an pe chhuak hlawm a ni.

Mini High Mast siamna tur hian veng chhung mipuiten sum an thawhkhawm a, senso zawng zawng hi Rs 385150/- a ni a, heng baka hian veng chhung eng mamawhna laiah eng pek zel tuma ruahman a ni bawk.