Mizoram Science, Technology & Innovation Council (MISTIC) Governing Body chu an Chairman, Chief Minister Pu Zoramthanga kaihhruaiin CM Conference Hall-ah nimin (3.7.2019) tlai khan 2019-2020 Annual Plan chungchang leh hmalakna pawimawh dang ngaihtuah in an thukhawm.

He meeting-ah hian Chief Minister Pu Zoramthanga chuan naupang ten science leh mathematics nuam an tih theihna tur zawnga zirna kalpui tha a tih thu sawiin, ram hmasawnna innghahna pawimawh tak pakhat a nih avangin science leh technology lama hmasawn zel chu ngaihpawimawh tul a tih thu a sawi. Meeting-ah hian SEDP hnuaia Bamboo Development kalpui tum dan chungchang te sawiin mihring mamawh oxygen pechhuaktu tha a nih avangin environment humhalh a sik leh sa siamthat kawngah pawh thui takin a tangkai tur thu sawi a ni.

Meeting-ah hian sawrkar kum kalta 2018-2019 chhunga MISTIC hmalakna report pe in, Mizoram puma science lam hmasawnna leh chawilarna programme hrang hrang neih tawh te a tarlang. Art & Culture Department-te nen tangkawpin Mizo hnam puan chi hrang hrang panga chu Geographical Indication Registry hnuaiah humhalh hna thawh kal mek chu GI Journal ah publish vek an nih tawh thu sawiin, sawibuaitu tumah an awm loh chuan kumin kum tawp hian hmawrbawk theih tur a ni.

He meeting-ah hian kum 2018-19 chhunga Audit chu pawm nghal a ni a. Technology Demonstration Centre din leh Mizoram Bioresource Development Centre din chungchang te sawiho a ni bawk.

MISTIC hi Science & Technology Directorate hnuaia Autonomous body pathum zinga pakhat a ni a. 1985 khan din niin Society ah 2015 khan register a ni. A dang pahnih chu Mizoram Remote Sensing Application Centre (MIRSAC), 1988 a din, 2007 a society a register leh Mizoram Science Centre (MSC), 2003 a din, 2017 a register an ni.