Vawiin khan I&PR Auditorium, CHANEM Building, Champhai ah Ni 3 chhung awh tur Champhai Block huamchhunga Village Council te tan Village Development Plan siam dan tur inzirtirna chu hawn a ni.

Training hi Pu F. Malsawmtluanga, Accounts Officer, DRDA, Champhai in a hawng a. Ministry of Panchayati Raj in Village Council te tihchakna tur scheme a duan Rastriya Gram Swaraj Abhyan scheme hnuaiah kalpui a ni a. Village Council te chu an thiamna leh theihna tipung tura inzirtirna chak taka kalpui na tur a ni a. Ruahmanna (Plan) siam dan te, tihhlawhtlin theih dan tur (Implementation), Vilzui hna (Monitoring) leh thlirletna (Evaluation) te chu thiam taka Village Council ten an tih theihna turin uluk taka training pek tur a ni a. Mizoram chhunga he hna thawk tur hian State Institute of Rural Development & Panchayati Raj, Mizoram, Aizawl chu ruat a ni.

Training hawnna inkhawm hi Pu Khuangthansanga Pakhuangte, Principal, Extension Training Centre, State Institute of Rural Development, Thingsulthliah in a kaihruai a.Training ah hian SIRD&PR Faculty te leh Local Administration Department (LAD) Officers ten zirtirna an pe ang a. Training ah hian Champhai Block huamchhunga Village Council thlan bik khaw 11 atangin Village Council President, Secretary leh Treasurer te an tel a.   Training hi karleh ah khaw thlan bik 12 te tan neih leh a ni ang.