No.7260/2020-2021

Covid-19 hri laka invenna tur vaccine pek beihpui thlak thawhkhatna chu vawiin chawhma khan CMO Champhai huamchhunga Vaccination Session Site thlan bik 4; District Hospital Champhai, Mimbung PHC, Ngopa CHC leh NE Khawdungsei PHC-ahte Covishield vaccine pe a bultan a ni. Covid-19 vaccine pek hawnna inkhawm tawi District Hospital Champhaia neih hi Pi Maria C.T. Zuali, District Bawrhsap chuan khuallian ni a hmanpuiin vaccine pek bultanna hi  a hawng a ni.

Pi Maria C.T. Zuali chuan hri laka invenlawkna vaccine siamchhuah hna chu  thil harsa leh hun duh tak anih thu sawiin, Covid-19 chuan tunhma hrileng SARS nen engemaw chenah inanna an neih nual avangin zirchianna lo neih tawh sate behchhana beisei aia hma daiha Covid-19 vaccine siamchhuah a ni thei chu thil lawmawm tak a ni, a ti a. India ram hmun kilkhawr ber pawl Champhai district-ah Covid-19 vaccine pekchhuah mai theih tura buatsaih ani ta chu district tana mellung pawimawh tak anih thu sawiin, vaccine pekchhuah tur chu mithiam te’n zirchianna leh enchhinna vawi duailo hmanga a him ani tih an finfiah hnu chauha pekchhuah anih avangin rinhlelh tur a awm lova, a hlauhawm loh a ni, a ti a. Champhai district chhungah tluang leh hlawhtling taka Covid-19 vaccine pek beihpui thlak neih anih theihna tura duhsakna hlan chungin a hawng a ni.

Hawnna hun kaihruaitu Dr. R.Lianmawia, CMO chuan tun thlengin Champhai district chhungah Covid-19 vei mi 94 hmuhchhuah an nih tawh thu leh an dam kim vek tawh thu a sawi a. CMO Champhai bial chhungah Primary Health Centre 11, Community Health Centre 2 leh District Hospital 2 te a awm mek thu leh vaccine pekna tura ruat Session site 16 zinga 4 ahte vaccine pek bultan anih thu a sawi a. A hawnniah hian District Hospital Champhaiah mi 100, Mimbung PHC ah 43, Ngopa CHC ah 34 leh NE Khawdungsei PHC ah 44, an vaiin mi 221 te vaccine pek hmasak tum a ni a, Session Site tinah nikhatah mi 100 zel pek hman tum a ni, a ti bawk. Second dose ni 28 hnuah pek leh tur anih thu sawiin, chumi hnu ni 14 atangin Covid-19 laka taksa ralvengtu a insiam chhoh tan dawn thu a sawi bawk.

District Immunization Officer (DIO) Dr. P.B Zodingliana hnen atangin report tlangpui ngaihthlak ani a. Covid vaccine pek hmasak turte chu hriselna lama thawktute an nih thu sawiin, sawrkarin a phut  angin Computer hmanga  Covid portal-a hming thehluhte chu a kahpaha thlan an nih thu leh tun thlengin Covid portal-ah CMO Champhai huamchhung atangin Health Care Worker mi 1292 te ziahluh an nih tawh thu a sawi a. Vaccine pek tur chu Antigen base anih thu leh 0.5 ml tihrawla pek tur anih thu a sawi a. Champhai khawpui chhungah vaccine pekna tur atan Session site 2, District Hospital Champhai leh Roseland School, Champhai Vengthlang-te buatsaih anih thu a sawi bawk.

Hawnna inkhawm tawi neih zawh anih hnu hian vaccine pek beihpui thlak tan nghal ani a. Champhai district-a Covid-19 vaccine la hmasa ber ni turin  Dr. Zatluanga, District Medical Superintendent, District Hospital Champhai hnenah vaccine hi pek ani a. Hemi hnu hian District Hospital Champhai leh vaccination session site dang thlanchhuah 3; Mimbung PHC, Ngopa CHC leh NE Khawdungsei PHC-ahte a dawng tura thlanchhuah hmasak Health department hnuaia thawktute hnenah vaccine hi pek chhunzawm a ni. CMO Champhai huamchhungah a thawhkhatna kaltlang hian vaccine dose 750 pek chhuah tura ruahmanna siam a ni.