No.7259/2020-2021

Vawiin khan Commerce & Industries Minister Dr. R. Lalthangliana’n Millenium Centre Roof Top ah puantah phochhuahna National Handloom Expo 2020 a hawng.

Health & Family Welfare Minister ni bawk Dr. R. Lalthangliana chuan COVID-19 hripui a len avangin midang tam tak ang bawkin puantah a eizawng te pawhin harsatna an tawk a. Thla 10 chuang an inhralhchhuak hlei thei lova, hripui nghawng an tuar nasa hle a ni, a ti a. Mahse kumthar ah hripui boruak in ziahawm lam a pan nia a lan mek avangin puantah a eizawng te chu beidawng lova tan khawh thara theihtawp chhuah turin a fuih a. Mizorama puantaha eizawng te chuan Mizoram sum leh pai dehchhuah economy ah thawh an nei tih hre chunga economy thanna leh khaichhhuahna kawnga an hnathawhin thui tak nghawng a nei tih te chu hre renga tan la thar turin a fuih bawk a ni.

Dr. R. Lalthangliana chuan Mizote hi kutthemthiamna kan nei tha a, hemi kawngah hian kan ngaihtuahna pawh a kal chak a tiin Mizoram mai nilo ramdang thleng pawh kan puantah leh thilsiam te an ngaihhlut theih nan leh hralhchhuah theih nan kan ngaituahna kan tihhriam a ngaia, chutianga ramdang el phak turin hma la turin ka duh che u a ni tiin puantah a eizawng te a chah a ni.

Expo hawnna hun hi Pu C. Lalrammawia, Chairman Mizoram Handloom & Handicrafts Development Cooporation Limited (ZOHANDCO) chuan kaihruaiin COVID-19 avangin nikum lam khan tum hnih lai Expo an buatsaih tur an lo tulh tawh thu a sawi. Expo hawnnaah hian Pu B. Lalthengliana, Chairman ZIDCO; Pu C. Ramhluna, Vice Chairman, Industrial Development Board leh Pu Lalthanliana, Chairman State KVI Board te an tel a ni.  

Expo hi ZOHANDCO buatsaih niin a funding agency chu Development Commissioner of Handlooms, Ministry of Textiles a ni a, January ni 23 thleng a awh dawn a ni. He Expo rualin ZOHANDCO hian National SC/ST Hub hnuaia Handloom Expo 2021 pawh an kalkawp tir bawk a. Expo-ah hian puantah a eizawng mimal leh pawl 30 chuangin an puantah leh thilsiam te an phochhuak a ni.