No.7258/2020-2021

Vawiin khan Information Minister Pu Lalruatkima, bialtu MLA ni bawk chuan Dinthar vengah Mizoram Cooperative Apex Bank (MCAB) Branch thar leh ATM a hawng.

Information Minister Pu Lalruatkima chuan Mizoram Cooperative Apex Bank chu Mizo mipuite hmasawnna atana din, thingtlang kilkhawr ber thleng pawha hman theih tur Financial Institution niin he Bank hian kan ram economy ah hmun pawimawh tak a luah a ni, a ti. Mizoram Cooperative Apex Bank din chhan bulpui ber chu – Mizo mipuite Coopertive (thawhhona) rilru leh thuvawn hmanga sum leh pai intanpui tawn leh mi harsa zawkten leirem an rah ve na atana rahbi siamsak a ni tiin Minister chuan a din chhan hrereng a, thawktute tan la zual turin a chah a. Thiltlang khaw kilkhawr ber thlenga hmasawn tir hi sawrkar thil tum a ni a, a hlawtlinna atan bank te an pawimawh tak zet a ni, a ti.

Pu Lalruatkima chuan pawisa leng vak leh indawrna hi tunlaiah chuan bank kaltlanga tih a nih deuh vek tawh avangin MCAB hian branch a neih zau bakah a sum leh pai hi Mizo mipuite ta hliah hliah a nih avangin a tangkai hle tih a sawi a. A bial chhung Dinthar venga MCAB in branch thar an hawng leh mamawhtu apiangte tana hman tur ATM hawn a ni ta chu lawmawm a tih thusawiin Dinthar Veng leh a chhehvel mipuite tan a tangkaiin a hlu hle dawn a ni, a ti.

Mizoram Cooperative Apex Bank hi ni 31.7.1982 a din a ni a. Vawiina Minister-in a hawn tak Dinthar MCAB Branch hi branch 22-na a ni. Apex Bank hi Mizoram mipui ta, a hlawkna pawh Mizoram ngeia hman leh hmuh a ni a. Tunah hian thawktu 158 an nei ni. Kum kalta chhung khan deposit cheng vaibelchhe 1240.88 an nei a, loan cheng vaibelchhe 792.91 an nei a, CD ratio 63.89 neiin hlep (profit) cheng vaibelchhe 12.62 an nei a ni. Mizo mipuite tana zau zawka rawng an bawl theihna turin branch thar hawn belh zel tura hmalakna kalpui mek a ni bawk.

Programme hi MCAB Ltd. Chairman Pi T.Lalmuanpuii’n a kaihruai a. Dinthar Veng Local Council chairman leh member te leh tlawmngai pawl hrang hrang hruaitute an tel a ni.