No.7257/2020-2021

Vawiin khan DC Conference Hall, Mamit-ah District Level Committee on Fire Prevention (DLCFP) chu an Chairman Dr. Lalrozama, IAS, District Bawrhsap hovin Fire Prevention Week, 2021 hman dan tur rela thutkhawm a ni.

Meeting-ah hian kumin 2021 Fire Prevention Week chu 8th February-ah LAD Conference, Hall Mamit-ah chawhma dar 11:30-ah hman nise tih a ni a. Programme kimchang duan nghal niin khuallian atan District Bawrhsap chu ruat niin Chairman-ah Jt. VC Chairman chu ruat nghal a ni bawk.

Kumin thupui atan hian "Kangmei tichhuak lo turin mitin i fimkhur ang u" tih chu hman a ni ang.

Pu PC. Lalchhandama, DFO, Mamit/ Member Secretary, DLCFP-in a tarlan danin State Level Sub- Committee thurel angin Mamit District chhungah March Ni 15 aia tlai lovah Lo/Leipui neitute'n hal vek nise tih a ni a, Lengpui Airport chhehvel khuate tan chawhnu dar 3:00 hnuah chauh lo/leipui hal nise tih a ni bawk.

Vawiin meeting hian Fire Prevention Week, 2021 chhungin kangmei laka fimkhur tura inzirtirna Electronics Media, School/College tinah zirtirna kalpui nise tih a ni a, District chhung khaw hrang hrang VC, YMA te nen thawk hova zirtirna kalpui bakah Group YMA Conference-ah a remchan dan anga zirtirna neih nise tih niin khawtin VC, YMA Information atangin kangmei laka fimkhur tura mipui zirtirna tlangau hmanga puanzar nise tih a ni bawk.

Kumin 2021 Fire Prevention Week hman chhung hian khua/veng kangmei vengtha thlan leh nise tih a ni a, Lawmman pakhatna atanga pathumna thleng siam niin pakhatna hian Rs. 50,000/-, Pahnihna Rs. 30,000/- leh Pathumna Rs 20,000/- a ni ang.

Meeting-ah hian District Level Committee members-te an tel a ni.