Vawiin khan Champhai DC Pu Vanlalngaihsaka hovin DC Conference Hall-ah Champhai Urban Area chhunga Digitization of Analog Cable TV Network hmalakna te sawihona hun hman a ni a. DC chuan Cable Operator-te chu an hmalakna leh harsatna tawh awm theite pawh zau taka sawi turin a sawm a ni.

Sorkar laipuia Ministry of Information & Broadcasting-in tuna Analog Cable TV Network hman mek chu ram pum huapa Digital Addressable System (DAS) a thlak vek tura thupek a chhuah bawhzuina ah hian District Level a mawhphurtu atan Additional Deputy Commissioner-te theuh ruat a nih angin Champhai Addl. DC Pu C. Lalzarliana chuan digitization chungchanga hriattur pawimawh te a tarlang a. Tuna analog signal hmanga cable kan pawh kalphungah hi chuan bill chawi pumpelh te leh Sorkar tan pawh sum tam tak hlauh a awm nasat thu te, digitization kalpui a nih tak tak hnuah chuan hmaih awm lova consumer zat hriat vek a nih tur thu leh tax te pawh dik takin a lut tur zat a luh theih tawh tur thu te a sawi tel a ni.

Vawiin sawihonaah hian Champhai-a cable operator pahnih - CCN, LCN leh an Sub-Operator-te an tel a. Digitization kalpui tur a nih ah LCN chu LPS (MSO)-te nen inremna an siamin hma an la chho mek a. CCN chuan Multiple System Operator licence neiin, an hnuaiah District chhunga sub-operator thenkhat te nen thawkho turin hma an la mek bawk.

Tunah hian Champhai District-ah Urban Area pali (Champhai, Khawzawl, Khawhai, Biate) ah te hian cable subscriber 6,839 awm anga chhut a ni a. Cable TV Operator-te chuan theihtawpa hma an lak thu an sawi a. Subcriber indaihkhawp tura Set Top Box a lo thlen zung zung theihloh avanga chak taka digitization kalpui chu a harsat thu te an tarlang bawk.

Cable TV Digitization hi kalpui anih theihna tur chuan subscriber tin ten Set Top Box an nei vek tur a ni a. Hei pawh hi a supply tu turte nen inbiak chhoh mek zel niin, Set Top Box hi TV pakhat atan pakhat zel hman tur a ni dawn a, TV pakhat aia tam ah a hman tawm theih dawnlo a ni. Subscriber-ten channel en duh zat an thlan a zirin a cable fee hi a danglam dawn bawk a ni.