Vawiin khan Pu John Siamkunga, South Tuipui bialtu MLA leh Mizoram State Law Commission Chairman ni bawk chuan Sub Divisional Agriculture Officer Office, Hnahthialah South Tuipui Cluster-a Agriculture Department leh Industries Department hnuaia NLUP tanpuina dawngtu mi 277 hnenah tanpuina a sem.

Khuallian Pu John Siamkunga chuan sawrkarin NLUP an sem nghal mai loh chhan sawiin, “Kuthnathawktu, dingchhuak tura an duhte thinlunga dinchhuah duhna tuh phawt tul a an hriat vang a ni,” a ti a. Bank-a pawisa puk dawnin dahkham leh guarantor-te a ngaih bakah a pung nen rulh leh a tul a, chutihlaia sorkarin mirethei leh harsate chhanchhuahna tura NLUP a sem hi thil ropui tak a nih avangin, “NLUP dawngtute pawhin min hmangaihtu sorkar hmangaih let hi kan bat a ni,” a ti a.

Law Commission Chairman chuan NLUP dawngtu mi hlawhtling tak tak, hralhchhuah tur thar chhuak hial te pawh an awm tawh thu sawiin, “Mi hlawhtlingte tharchhuah hralhna tur hi sorkar pawhin a dap mek a ni,” a ti a. NLUP anga sum sem hi nakin lawkah chuan a awm thei tawh kher lovang a, chutih hunah chuan sorkar hian min dawmkan tum teh mahse a theih loh hun a awm dawn avangin a tuartu tur chu keimahni bawk kan ni tih inhria a thahnemngai turin a fuih bawk.

Inkhawm hi Pu Lalringliana SDAO-in a kaihhruai a. Pi R. Lalrodingi, GM, DIC leh Pu Lalringliana SDAO-ten technical report an pek bakah Pu Kannan Gopinathan, IAS SDO (C), Pu Zathangliana, Coordinator NLUP Lunglei District te pawhin thu an sawi bawk a ni.

Vawiina sum semchhuah zawng zawng hi Rs. 69,47,400.00/- a ni.