Sawrkar thil pawimawh ti a New Delhi a cham mek Pu John Rotluangliana, Tourism Minister chuan vawiin khan Union Minister of State for Tourism Dr. Mahesh Sharma chu a office ah a hmu a. Central Ministry in 'Swadesh Darshan' hnuaia cheng Vbc 94.91 man 'New Eco Tourism projects 2015-2016 Thenzawl leh S. Zote te approve leh sanction a nih avangin lawmthu a hrilh.

He projects hi zawh a nih hunah chuan ramchhung leh ram pawn atanga tourists tam tak hip lut tura rin a ni. Thalai lehkhathiam hna nei lo te tan hna a siam dawn bakah, a bul hnaia cheng mipuite tan eizawnna tha tak siam ngei tur a nih thu a sawi.

Minister hian Mizorama Adventure tourism lama hma lakna a sawipui bawk a. Mizo thalai ten Eco Adventure Tourism an tuipui dan te, Thalfavang Kut 2014 leh 2015-a recreation flying, demonstration & joy ride an hlut dan te a sawi a. Chuvangin, "Aizawl Eco Adventure Tourism Circuit" Swadesh Darshan hnuaia dilna awm mek pawh sanction ni thei se a duh thu a thlen a.

Central Minister pawh a lo inhawng hle a. New Eco Tourism project atana sanction tawh fund te kha Utilisation Certificate submit nisela. Chumi hunah chuan, proposal dangte chu a hmatiama sanction a inhuam thu a lo hrilh a ni.