Champhai leh Zotlang inkar, leilet kawng ngil lai chhia chu vawiin khan siamthat a ni.

Kawng chhia hi kawng chhak atanga kawngthlang lama tuiluanna hmun a ni a, kawng hi a khuar thuk avangin lirtheiin an zawh hleithei lova, vawiin khan hun rei tak chhung chu lirthei an tangkhang nghe nghe a ni. Helai kawng hi World Bank enkawl niin, fur lai a nih avangin kawng hi tha taka siamthat theih a la ni lova, vawiin khan Champhai DC Pu H.Lalengmawia ngenna angin World Bank lam hian boulder an dah a, a chap darh leh a siamthat hna hi lirthei tangkhang khalhtute leh a neitute chuan an thawk a, vawiin chawhnu lam khan kawng khuar chhe zual lai chu an hnawhkhah a ni. Heti chung hian lirthei tan zawh a la harsa hle thung. Kawng chhia hi naktuk hian DIET staff te leh in-teachers training nei mekte chuan hnatlangin a siamthat hna an thawk dawn a ni.