Vawiin chawhnu dar 1 khan DC Conference Hall, Keifangtlangah District AIDS Prevention and Control Committee (DAPCC) chu Chairman Champhai DC Pu Vanlalngaihsaka IAS hovin an thu khawm. He hunah hian Champhai District chhunga HIV/AIDS dinhmun tlangpui thlirhona leh hmalak zel dan tur sawihona neih a ni a. Line Department hrang hrangte hnathawh, hmalakna leh mawhphurhnate sawihona leh enzuina neih nghal a ni bawk a ni. 

Meeting chuan a tam thei ang ber HIV/AIDS chungchangah inhrilhhriatna neih nise a ti a. Hemi tur hian line department hrang hrang, Media, NGO leh khawtlang hruaitute thawkho zel tura hmalak nise a ti a. Meeting pawh thla thum dan zelah neih thin tawh nise tih a ni bawk. 

District AIDS Prevention and Control Unit (DAPCU) Champhai District-in a tarlan dan chuan Champhai District chhungah kum 2011  atanga September 2017 chhungin thisen test 41,513 atangin za zela 3.23 chu HIV positive niin Nu naupai test 23,182 zinga za zela 0.71 chu HIV Positive an ni tih hmuhchhuah a ni. Kum 2013 atanga September 2017 thlenga HIV inkaichhawnna tlanglawn ber chu Mipat hmeichhiatna hman (51.40%)  niin hei hi State average 71% aiin a hniam zawk a ni. Tunhnaia inkaichhawnna darh chak ber chu inchiuna hriau leh syringe thianghlimlo hmanpawlh (42.9%) atangin a ni a, hei hi Mizoram pum average (30%) ai pawhin a sang zawk a ni. Thisen dawn (Blood Transfusion) hmangin kaichhawn a awm lo thung a ni. Heng bakah hian Nu atanga nautein a kaichhawn za zela 4 leh a chhan hriat mai loh za zela 1.80 te an awm bawk a ni. 

Kum bithliah bikah HIV positive tam ber chu kum 25 atanga 34 ( 46.40%) an ni a. Hei hi kum 15-24 (22.15%); kum 35-49 ( 18.46%) ; kum 14 hnuai lam ( 4.5%) leh kum 50 chung lam ( 0.32%) ten an dawt a ni. Kumin January-September chhunga kai tam ber chu Kum 25-34 (43.82%) an ni. 

HIV natna hrik hi khawvelah kum 1981 khan Los Angeles (USA) ah hmuhchhuah a ni a. India ramah chuan kum 1986 khan Chennai-ah hmuhchhah a ni a. Mizoram bikah chuan he natna hi kum 1990 ah hmuhchhuah a ni.  Kum 27 chhungin HIV/AIDS positive 14,632 (March 2017) an awm a, ART Inenkawlna centre a in register 10,835 an awm laiin in register ve lem lo/bibo 2,076 an awm anga chhut a ni bawk. HIV/AIDS vanga thi hi mi 1,568 an awm tawh a ni. Mizoram mihring za zela 0.81 ( ANC HSS 2014-15) hi HIV/AIDS vei an ni. 

Meeting-ah hian Champhai khawpui chhunga sawrkar department hrang hrang aiawh, Dropping centre-a thawktute leh VC te an tel a ni.