ICFAI University Mizoram din champha vawi 10-na lawmna kal zelah North Eastern Council (NEC) nen tangkawpa ni hnih awh tur International Conference an buatsaih, ‘Development of North-east India through linkages with South and South East Asia’ chu vawiin chawhma khan ICFAI University Auditorium-ah hawnna neih a ni a. Mizoram Governor Lt. Gen (Retd) Nirbhay Sharma PVSM, UYSM, AVSM, VSM, chu Khuallian niin a hmanpui. 

Khuallian Lt. Gen. Nirbhay Sharma chuan hmarchhak bial tih hmasawn chu thil phurawm tak a nih rualin chona lian tak a nih thu a sawi a. Tun hmain hmarchak bial chu ram venhimna zawn atang chauha thlirin, a hmasawnna kan ngaihthah thin a ti a. Ram ralmuang zawk kan lo nih takah chuan hmasawnna ruhrel pawh chak zawkin kan siam thei dawn a ni, a ti. Hnam hrang hrang leh nunphung inanglo tak tak, India khawmualpui atanga danglamna bikna riau nei a ni a, hnam inchimral hlauhna avangte in harsatna a awm a. An harsatna kan hriatthiam hmasak phawt loh chuan, sum tam tak sen ni mahse, hmasawnna lian tham a thlen theih a rin loh thu a sawi a ni. 

Governor chuan internet hmanga inthlunzawmna chu senso hautak lo zawk leh ngaih pawimawh hmasak bera neih chi a ni, a ti a. Thlawhna, kawngpui, rel leh lui hmanga inkalpawhna te pawh tih changtlun tul a tih thu a sawi a ni. Heng hmarchhak ramte ramri 98% chu ramdangte nena inrina a nih nghal avangin, venhim hna nasa lehzuala kan thawh a ngai a ni, a ti bawk. 

ICFAI University Vice Chancellor Lt. Gen. (Retd.) Dr. A.K. Misra AVSM chuan ICFAI University chu India rama private university group lian berte zing ami a nih thu sawiin, State 16-ah te in zar pharh in, university 11 leh business school 9 te, technical school  7 leh  law school 5 te a awm thu a tarlang a ni. Kum 10 kalta chauha din ni mahse hma an sawn chak hle a ti a, sawrkar puihbawmna zawng zawngah lawmthu a sawi bawk a ni. 

He Conference-a Convener, Dr. K. Angela Lalhmingsangi chuan Conference hawnna thuchah a sawi a. Ambassador Gautam Mukhopadhyaya;, Air Marshall (Retd) P.K. Roy PVSM, AVSM, VSM, VM; Ministry of External Affairs Joint Secretary Partha Satpathy, IFS leh MZU VC Prof. Lianzela te pawhin thu an sawi a ni.