Vawiin khan Fisheries Minister Pi Vanlalawmpuii Chawngthu chuan Mizoram Fisheries Technical Service Association (MFTSA) Special Conference ni hnih awh tur chu Fisheries Directorate Conference Hall-ah a hmanpui.

Fisheries Minister Pi Vanlalawmpuii Chawngthu chuan Fisheries Department hmalakna te fakin luidung humhalh chungchanga YMA nena an thawhhona chu lawmawm a tih thu a sawi a. MFTSA member kalkhawmte hnenah chuan hna tuichilh a pawimawh thu sawiin hlawh lakna maia ngai lova hmasawnna tura theihtawp chhuah turin a fuih a. Data Collection ngaih pawimawh a tul thu sawiin kum tina hmasawnna chiang lehzuala hmuh anih theihnan record fel taka vawng turin Minister chuan a chah bawk a. Fisheries Minister chuan hmasawn nana theihtawp chhuah tura fuihin  ka ram a ni, ka department a ni tih rilru i pu theuh ang u, a ti a. Fisheries Minister chuan rinawm, taima, dik tak leh hmasawn duhna rilru pu chunga thawhho puiah MFTSA chu a sawm nghal a ni.

He huna Khualzahawm Fisheries Department Secretary Pu Thlamuana pawhin thu sawiin sangha khawitute leh ram tan thahnemngai taka thawk zel turin MFTSA chu a chah bawk a ni.

MFTSA Special Conference hi Pu Lalrochhara MFTSA President chuan a kaihruaia, General Secretary leh Finance Secretary hnen atangin Report kimchang ngaihthlak niin Pu K. Lalrinmawia MFTSA Executive member hnen atangin Special Conference thupui “Sangha tam zawk thar chhuah”  ngaihthlak a ni a. He hunah hian Pu SP Singh, Director Fisheries Department pawhin thu a sawi a, member kal ta te sunna hun hman a ni bawk.

Mizoram Fisheries Technical Service Association Special Conference hi ni hnih awh tur niin vawiin chawhnu lamah “Prospect of Breeding and Culture of Mahaseer in Mizoram” leh “Extension Management” tih thupui zirhona hun an hmang a. Naktuk lamah Conference hi hman chhunzawm tur niin rorel leh inthlanna neih a ni ang. Tun dinhmunah MFTSA hian member 66 an nei a ni.

 

Attachment

  • Loading attachment...