Minister Pu KS Thanga chuan Irrigation & Water Resources Department a chan atanga a vawikhatna atan vawiin khan a pisaah Department officer-te nen inkawmhona hun an nei.
Minister KS Thanga chuan Irrigation & Water Resources Department chu mipui rawngbawlna kawnga fawng pawimawh tak vuantu, Mizoram ang “agricultural land” a ram ei leh bar hmasawnna innghahna pui ber tui/water resources changtu an nih avanga thawktuten mawhphurhna lian tak an neih thu a sawi a. Tuna JICA nen thawkhova buh leh bal dehchhuah danah hlawk zawk leh daih rei zawk kawng ngaihtuah tura hma an lakna chu a hlawhtlin ngei a beisei thu sawiin, Japan mithiam te nen an thawhhona chu remchangah la a, hnathawh dan kalphung tha zawk zirchhuah theih awmte pawh zirchhuak ngei turin a chah a. Minister chuan tha taka department in hna a thawh dawn chuan inpawhna tha tak neih a pawimawh thu leh, Minister a nihna angin thil tulah chuan engtik lai pawhin department tan a inhawn reng thu a sawi a. Thawktute pawh mipuite tan inpekna rilru pu in, thahnemngai taka thawk thin turin leh, office dawrtute dawngsawn kawngha pawh khirhkhiap lo zawnga dawr nuam taka awm zel tur te in thawktute a chah a ni.
Vawiin meeting hi Irrigation & Water Resources Secretary Pu H. Lalengmawia chuan a kaihruai a; zau zawka hna a thawh theih nan department hming chu sorkarin a thlak thu sawiin, mahni inrintawkna nen thawktute pawhin thahnemngai taka an thawh a pawimawh a ni, a ti. Tuna JICA leh Mizoram Sorkar thawhdunna kal mek pawh department dang eng emaw zah nen kaihkawp a nih avangin state level leh district level ah pawh thawhhona tha tak heng department te karah hian neih a tul thu a tarlang bawk.
Er. Lalrotluanga, Chief Engineer, Irrigation & Water Resources Department chuan department chungchang leh hmalakna kal mek te a sawifiah a. Accelerated Irrigation Benefits Programme (AIBP) hnuaia hmalakna, tuna Pradhan Mantri Krishi Sinchai Yojana (PMKSY) a rinluh tak te, NABARD hnuaia hna neih mek leh project thar dil mek te, JICA hnuaia hnadinhmun te leh a dangte a sawi a ni.
Irrigation & Water Resources Department ah hian post 225 bakah CSS hnuaiah mi 5, a vaiin post 230 a awm a. Chung zinga post 120 chu technical post a ni a. Post awm zawng zawnga 38% bawr vel chu hnawhkhah lovin tunah a awm mek a ni.
