Vawin khan Champhai DC Pu Zoengsanga hovin Champhai DC Conference Hall-ah kumin Sorkar kum chhunga District Level Review Committee, District Consultative Committee and District Level Security Committee (DCC/DLRC/DLSC) meeting vawi hnihna chu neih a ni a. He meeting, State Bank of India, Lead Bank Office, Champhai bul tuma neihah hian Champhai District chhunga Bank hrang hrang hotute leh Sorkar Office hotute an tel a. July atanga September thla chhunga an hmalaknate leh harsatna an tawhte sawiho a ni.
Champhai DC Pu Zoengsanga chuan Mizoram chu ei leh bara ram intodelha siam nan leh tihhmasawn nan kuthnathawktute ngaihsak a tul thu sawiin, bank thawktute pawhin anni chu ngai pawimawh tura a duh thu a sawi a. Account pekchhuah kawngah pawh fimkhur a tul thu a sawi a. Bank lamin harsatna an tawk a, District Administration lam atanga chinfel theih a nih chuan engtik lai pawhin an inhawn thu Pu Zoengsanga chuan bank hotute chu a hrilh bawk.
Pu Pradip Nandi, Chief Manager (Lead Bank), SBI Champhai chuan meeting hmasa zawka target siam tawhte chu tihhlawhtin ngei tumin bank hrang hrangte chu hmala chhunzam zel turin a sawm a ni.
Vawiin meeting-ah hian meeting hmasaa an thurel tawhte chu thlirletna bakah hmalakna tur hrang hrangte an sawiho a. Thla khata vawi khat tal Financial Literacy Camp (FLC) buatsaih tur a tih chu branch tam zawkin kalpui tawhin, a aia nasa zawk a kalpui zel tura rel a ni a. Pradhan Mantri Jan Dhan Yojana (PMJDY) hmalakna hnuaia chhungkaw tin atanga mi pakhat talin bank account hawng tura hmalakna te, Agricultural loan leh non-farm sector hrang hrang atana loan pekchhuah zat te leh Self Help Group tanpuina atan target te sawiho a ni a. Kum 2014 chanve chhung hian Kisan Credit Card (KCC) 259 pekchhuah a ni tawh a ni.
Champhai District-a SBI, MRB, MCAB, HDFC leh Canara Bank branch hrang hrangte vawiin meeting-ah hian an tel a. Loan rulhna hmuhlet harsatna chungchang sawiin, hemi kawnga ruahmanna thar siamte sawiho a ni a. Account hawng thar tur chuan Voter's ID (EPIC) an neih a pawimawh thute sawiho a ni.
