Nimin khan Sub Committee on Fire Prevention chu an Chairman, Forests & Environment Minister ni bawk Pu Lalrinmawia Ralte hovin a Office Chamber an thukhawm a, nakkum January thla a Fire Prevention Week-2015 hman dan tur an rel.

He meeting ah hian nakkum, 2015-a Fire Prevention Week chu kum dang aia hma, January ni 19 leh ni 25 inkarah hman tum nise tih an rel a. State Level Inaugural function chu Fire Prevention Week ni hmasa ber January ni 19 ah Assembly House Annex Conference Hall a neih nise tih a rel. Kum hmasa lama lo tih tawh angin tlangram 'Lo hal' pawh March ni 15, 2015 hma a neih vek tur a rel a ni a. Hemi chungchanga Hriattirna pawh district tina DC ten lo chhuah se tiin rel a ni bawk.

He meeting ah hian Sub Committee on Fire Prevention Chairman leh Forests & Environment Minister ni bawk Pu Lalrinmawia Ralte chuan Mizoram a kan asset pawimawh leh hlu ber chu kan natural resources, heng ramngaw leh nungchate hi an ni a, Mizoram leh Mizote khawvel hmun dang a hriat kan nih theihna pawimawh ber a ni tiin uar takin a sawi a.Heng ramngaw leh nungchate nasa zawk a humhalh anih theih nan Committee member te a sawm.

Sub Committee on Fire Prevention chuan department hrang hrang hotute leh environmental NGOs atangin member 26 a nei mek a ni.