Mizorama lirthei eizawn nan a hmang te infinkhawm pawl Commercial Vehicle Joint Action Committee chuan an lungawihlohna lantir nan December ni 10 atanga dar 72 chhung, December ni 12 thleng truck, taxi, bus, pickup leh 407 te tlan lova din an tum a. Hemi chungchangah hian Transport Minister Pu John Rotluangliana chuan vawiin khan a Office Chamber-ah thuthar thehdarh tute leng a sawmin Press Conference a nei.

Press Conference-ah hian Pu John Rotluangliana chuan Mizo Kristian te hunpui Krismas hmang tura Zoram mipuite kan inpuahchah lai leh Synod Inkhawmpui lai taka hetiang lungawih lohna CVJAC ten huaihawt an tum chu pawi a tih thu a sawi a. An lungawih lohna lantir chhung hian mipuite nunphung khaihlak tur engemaw chen tih ziaawm nan Sawrkar chuan hetiang hian ruahmanna a siam.

December ni 10 leh ni 12 chhung hian MST bus leh Department bus te chu Aizawl khawpuia tlan (service) tir an ni dawn a, naktuka Turial Airfield-a Thalfavang Kut-a kal duhte tan MST Bus Station Chaltlang atangin MST bus tlan(service) tir a ni dawn bawk.