Tukin zing khan Geology & Mineral Resources Department (DG&MR) changtu Minister Pu H. Rohluna leh Parliamentary Secretary Pu Joseph Lalhimpuia te chuan Ramhlun North Sports Complex leh Ramhlun Vengthar a leiminna hmun an enfiah a.
He leimin na hmun hi a nasat thin em avangin a danna leh tihtawp (control and mitigation) na atan Project changtlung tak buatsaihin Central sorkar ah thehluh a ni a, a tul angin sum pawh a thawh khatna pek mek an ni. He hnaah hian Disaster Management & Rehabilitation (DM&R) chu Nodal Department niin Department of Geology & Mineral Resources (DG&MR) chu Executing Agency a ni bawk. A hmunah hian AIE Consultancy Agency in an vil mek a, hnathawh tawh leh thawh mekte ngunthluk tak leh chik taka en en hnuah a tha tawk rih nia hriat a ni. A veng neitu Local Council Chairman Pu Parliana, Vice Chairman Pu Ringzova leh member dangte pawhin tha tawk an tih thu Minister hi an lo hrilh bawk.
Helai leimin na hmun leh a tihtawp leh a danna tura hnathawh mekna hmun hi November thla tir lam khan National Disaster Management Authority (NDMA) a an Special Consultant Dr. Ravindar Singh (Expert on Landslide and Avalanches), Govt. of India, New Delhi chu a hmunah rawn kalin hnathawh dan chipchiar tak leh DPR siam dante ngun takin an rawn enfiah tawh bawk.
Dr. Ravinder Singh chuan Mizoramin he leimin atana DPR a siam chu India rama State dangte entawntlak khawpa thaa siam anih thu leh hnathawh kal mek pawh a tha tawk a tih thu a sawi bawk.
Dr. Ravinder Singh hian hetianga ngaihdan a neih avang hian Directorate of Geology & Mineral Resources chu a rang lama leimin zualna hmun 3 vel tan DPR siam leh thuai turin thu a rawn a, tunah hian heng leimin chhanna tur atan NDMA ah cheng vaibelchhe 500 lai pek mai theih turin sumte India ram state hrang hrang tan dah mek a ni a ti bawk.
Pu H. Rohluna Minister leh Parliamentary Secretary Pu Joseph Lalhimpuia hi Directorate of Geology & Mineral Resources Commissioner Pu Lalthankhuma, Director Dr. H. Lallenmawia leh Department Senior Officer te bakah AIE Construction a Engineer te leh veng chhung mi pawimawh ten an tawiawm bawk.
