Lead Bank Office bultumin nimin khan DCC/DLRC leh DLSC chu an Chairman Champhai DC Pu H. Lalengmawia kaihhruaiin DC Conference Hall-ah kumin April atanga June thla chhung hmalakna thlirhovin an thukhawm a. DC chuan Bank Manager te chu Champhai District hmasawnna ngaihtuah hnathawk tura chahin, loan pek chhuah tura bituk awmzat chu tlin theih hram nise a duh thu a sawi a ni.

Nimin thutkhawmah hian RBI aiawh, NABARD aiawh leh Bank hrang hrang aiawhte bakah, department hrang hrang, Police Department leh NGO te an tel a. June thla thlenga District chhunga Bank hrang hrangte hmalakna thlirho a ni a. June thla thleng khan Champhai District-a bank pumpui CD ratio chu 65.88% a nih thu tarlan a ni a; Annual Credit Plan hnuaiah loan pek chhuah tura bithliah, za zela 11 atangin Agriculture loan chu 13% pek chhuah tawh a ni bawk.

Meeting-ah hian NABARD-in PLP 2016-17 an siam mek chu sawiho a nih bakah, Financial Literacy Campaign neih tawh dante pawh thlirho a ni bawk a. Hei bakah hian PMJDY hmanga bank hrang hrangte hmalak dan thlirhovin, Champhai District-a Urban Area 22 leh, Rural Area 83-a cheng chhungkuaa mi pakhat zelin bank account an neih tawh thu te tarlan a ni.