Vawiin khan Champhai DC Conference Hall-ah kum 2014-2015 quarter tawp ber atan District Consultative Committee/ District Level Review Committee/ District Level Security Committee (DCC/DLRC/DLSC) meeting neih a ni a. He meeting hi Champhai DC Pu H. Lalengmawian kaihruaiin, RBI aiawh official leh Champhai District chhunga Bank hrang hrang atang Branch Manager-te leh Sorkar Office hotute an tel a. Potential Linked Credit Plan, 2015-2016 Champhai District tan a NABARD buatsaih chu tlangzarh nghal a ni.

Champhai DC Pu H. Lalengmawia chuan mipui rawngbawltu vek kan ni tih hriain loan pek kawngah mi harsa zawkte ngaihpawimawh nachang hre tlang turin bank manager-te chu sawmin, District Administration leh a kaihhnawih department-te nen a theihna apianga inpuihtawn a pawimawh thu a sawi a. Mipui lampangah pawh zirtir ngai tam tak kan la awm a ni a ti a, an hriatloh vangin mi tam tak chuan Sorkar approve sa scheme-ah pawisa dah nachang hrelovin, chiahpuam himlo tak taka dah zawkte an awm thin chu inhrilhhriat kan la ngaih nasat zia tilang tu a ni tiin Chairman chuan Financial Literacy Campaign pawh kalpui ngawrh lehzual turin a chah a ni.

Meeting-ah hian tunlaiah bank account details  number, ATM PIN number leh thil dang dangte zawta mi bum hmang an awm chu ngaihpawimawhawm tiin hemi chungchangah hian fimkhur tura mipuite hrilhhriat thar ni se tih a ni a. Bank chuan phone-in emaw e-mail hmang pawh in tumah an account details an zawh ngailoh bakah, online shopping ti tan pawh fimkhur a pawimawh thu tarlan a ni.

Vawiin Meeting-ah hian Quarter ending hmasa a target an lo siam tawhte an ti hlawhtling tawk em tih sawiho a ni a. Credit Deposit ratio (loan an pek chhuah per cent)-ah bank tam zawk chuan target rate (norms rate) 60% an tlin thei a, target hlat ber bank chuan 39% a pe chhuak a ni. KCC loan hi kumin chhung hian bank hrang hrangte pekchhuah belhkhawm chu 651 a ni a, an zingah hian Mizoram Rural Bank hian 499 pechhuakin mahni target khum awm chhun leh pe chhuak hnem ber a ni. Agriculture Loan bikah Norms rate 18% khum thei chu Canara Bank (44%) chauh a la ni rih a. SBI leh MRB hnuaiah 2014-2015 chhung khan Self Help Group (SHG) 29 hnenah puihna pek a ni a, SHG 71 tan deposit Account hawn a ni bawk.

Annual Credit Plan 2014-15 huam chhunga 31.03.2015 thlenga Bank-te hlawhtlinna rate chu Agriculture Advance ah 38%; Non-Farm Sector (rural artisans/ weaving industry)-ah 87%; Service Sector-ah 95% niin, a vaiin 71% tih hlawhtlin tawh a ni a. Annual Credit Plan 2015-2016 pharh chu member-ten an pawm tlang a ni. Financial Literacy Campaign (FLC) hi thlatin vawikhat tal neih tura rural branch-te phut an nih chu bank tam zawk chuan an tihlawhtling tawh bawk.

Meeting-ah hian Bank Security chungchang sawi tel niin, bank tam zawk chuan security personnel an nei tawh a. La neilo tan pawh ruahmanna siam a nih thu tarlan a ni a. Champhai SP Pu RP Meena chuan Bank security lamah tha taka hma an lak thin thu tarlangin, hun bi nei a check thin a nih mai bakah thawn thut enfiahna pawh neih a nih thin thu a tarlang a ni.

Vawiina DCC Meeting hi SBI, Lead Bank Office Champhai buatsaiha neih a ni a. Pu Pradip Nandi, Chief Manager (Lead Bank), SBI Champhai chuan bank tinten an target thar chu tihlawhtling ngei tura hma la chhunzam zel turin a sawm a. NABARD Asst. Project Manager Pu J.D. Traite chuan lawmthu sawiin meeting hi a khar a ni.

Attachment

  • Loading attachment...