1374/2023-2025
Champhai the 3rd August, 2023 - Vawiin khan Champhai DC Pu James Lalrinchhana chuan Champhai District Jail, a tlawh.

Champhai DC hi official thenkhat ten tawiawmin District Jail Superintendent Pu Thuthlungropuia leh a thawhpuiten anlo dawngsawng a. District Jail hmunhmate uluk taka fangchhuakin Jail chhung inrelbawl dan te, facility awm mekte leh an mamawhte uluk takin a zirchiang a. Silpaulin, volleyball leh net leh Independence Day 2023 an lawmna tur pawisa fai cheng sing khat leh sang hnih (Rs.12,000/-) an hlan nghal ni.

District Jail ah hian thawktute leh jail tangte nen inkawmhona hun neih niin Pu James Lalrinchhana chuan Disitrict jail dinhmun tlangpui te leh an mamawh te zirchiang tura tlawh anih thu a sawi a. Jail tangte chu an nun siamthatna hmun atana Jail chu hman tum tur leh an chhuah hunah pawh khua leh tui tha, ram leh khawtlang tana mi tangkai ni tura inpuahchah tura chahin an taksa leh rilru hriselna ngai pawimawh theuh turin a chah a. Jail an awm chhunga an hun awl tha taka an hman theihna tur leh thiam thil hrang hrang zirna (skill development) ruahmante a ngaih pawimawh takzet thu DC chuan sawiin an mamawh hrang hrangte inthlahrung hauh lova a hnena thlen thin turin a chah a ni.

District Jail thawktute leh jail tangte hian an mamawh hrang hrang te DC hnenah lo thlenin DC chuan tih hlawhtlin sak ngei a tum thu a sawi a ni. A hnena anlo thlen Jail tualzawl siam that hna chu thawh thuai anih tur thu a sawi bawk a ni.

Champhai District Jail hi Sirte Tlang ah awmin 29/11/1990 ah khan hawn a ni a. Mipa 85 leh hmeichhia 20 an zavaiin mi 105 an leng a. Tun dinhmunah mipa 175 leh hmeichhia 14; an zavaiin mi 189 awm mekin District Jail hi a chep hle thu thawktute hian an report a ni. Tun dinhmunah thawktu mi 32 an awm mek a ni.

Jail tang mekte zingah hian ruihhlo avanga man (ND&PS Act) tam berin mipa 111 leh hmeichhia 13 an awm a. Mipa 4 tualthah case avanga man niin, mipa 28 te Rape/POCSO Case a man an ni a, mipa 24 rukruk case a man an ni.