Champhai District Swachh Bharat Mission (Gramin) Committee chu vawiin chawhma khan an Chairman Champhai DC Pu H. Lalengmawia hovin a pisa-ah kumin atan thla thum dan thutkhawm vawi hnihna neiin, District chhunga hemi scheme hnuaia hmalak zel dan tur an sawiho.

Meeting kaihruaitu Champhai DC chuan Swachh Bharat Mission-in a tum ber chu mipui ah faina leh thianghlimna ngaihsakna tuh a nih angin, tuna inthiarna leh bawlhhlawh sawngbawlna mumal siam tura hna thawh mekah pawh hian sak zawh zat tam tak neih ai chuan open defecation - inthiarna hmun mumal neilo zat tih hniam chu kan ngai pawimawh zawk tur a ni, a ti a. Hmachhawp siam te chu hnathawh theih hunlai hian a hma thei ang bera thawh a pawimawh a tih thu a sawi a ni.

Vawiin meeting-ah hian khawpui huamchin lo zawng khuaah te Solid & Liquid Waste Management, Individual Household Latrine (IHHL) leh Community Sanitary Complex sak dan tur leh sak zat tur te ngaihtuah a ni a. Rural Development Department nen heng hmalakna atan hian thawhhona (convergence) dan tur ngaihtuah a ni a. Model Village a puan te ngaih pawimawh a tul thu te sawi a ni.