District Education Officer leh District Child Protection Unit, Lunglei tangkawpin vawiin khan DPO Recreation Hall, SSA, Lunglei-ah ‘Sensitization of Nodal Teachers on Protection of Children from Sexual Offences(POSCO) Act 2012’ neih a ni a. Workshop hi Lunglei DC Pu Ashish Madhaorao More chuan hawngin, Lunglei khawpui chhunga Primary, Middle, High leh Higher Secondary School zawng zawng atangin POSCO atana Nodal Teacher ruatte an tel a ni.

Workshop on POSCO hawnna inkhawm Lunglei DEO Pu Lalrambuatsaiha kaihhruaiah Lunglei DC Pu Ashish More chuan naupangte himna hi ngaih pawimawh hmasak bera kan neihte zingah tel tur a ni a, sorkar bakah khawtlang, chhungkua leh mimal tinte mawhphurhna a ni, a ti. Nu leh pa ten ngaihngam takin an fate sikul an kal tir a, zirtirtute chuan an fate tha taka an enkawl sak an beisei bawk a, chuvangin naupang chherchhonaah, an chanvo dik tak leh an sahimna chu thui takin zirtirtute kutah a awm a ni tiin zirtirtu kalkhawmte chu an thawhna sikul theuhah an thawhpui zirtirtu dangte hnenah pawh POSCO Act chungchang hrilh chhawng turin a chah a. Naupang chunga hleilenna leh naupang khuaikhem te hi khawpuiah deuh chauh thleng tura ngaihna thui tak a neih thin sawiin Pu Ashish More chuan tunhnaia Mizoram hmun kilkhawr leh khaw te zawkah te pawh naupangte chunga vanduaina thleng tih a hriat chuan a thinlung a ti na hle a; misual kuta naupangten vanduaina an tawk thin chu tu fa chungah pawh leh khawi hmunah pawh a thleng thei a ni tih a tilang chiang a; chuvangin kan fate kan hmangaiha kan enkawl ang bawkin mi fate pawh hmangaihna leh lainatna nen kan en a ngai a ni, a ti bawk. Lunglei District huamchhungah naupangte chungah vanduaina rapthlak engmah a thlen loh nan sorkar hnathawk zawng zawng, sikul tinte bakah khawtlang, kohhran leh chhungkua zawng zawngte chu tangrualin kan hnam rohlu naupang pawisawilo te tan he ram hi chenna nuam leh thlamuanthlakah i siam ang u, a ti bawk.

Lunglei DEO Pu Lalrambuatsaiha chuan Child Protection Unit-te nena tangkawpin Lunglei District chhunga Nodal Teachers zawng zawngte tan POSCO Workshop buatsaih a nih mek thu a sawi a; September ni 1 khan Lungsen-ah Workshop neih a ni tawh a, vawiinah Lunglei khawpui chhung bik atan neih lehin September ni 8 khian Hnahthialah neih an tum thu a sawi. Zirtirtu zurui chunga class la, kal tha lo tihte chu thil zahthlak tak a ni a, chung aia Education Department tihmelhemtu thin chu zirtirtu mahni zirlai naupangte khuaikhem thin tih thawm hriat hian a ni tiin Dan-in naupangte chanvo a hauh natzia leh an sahimna turin ruahmanna fel tak a awm thu leh naupang chunga thiltisualtute hremna a khauhzia te a tarlang bawk.

Vawiin POSCO Act Workshop-ah hian a hnuai mite hian thupui hrang hrang hmangin zirtirna hun an hmang a ni :

1. S.Zorinmawii, Social Worker, DCPU, Lunglei - ‘Child Protection & Related Issues’

2. S.Lalrotluangi, Legal-cum-Probation Officer, DCPU, Lunglei - ‘Protection of Children from Sexual Offences (POSCO) Act, 2012’

3. B.Laldingngheta, SDPO, Lunglei - ‘Legal Issues relating to children’