December ni 3 (Pathianni) hi Rualbanlo/ Vohbikte Ni, International Day of Persons With Disabilities a ni a. Hemi pual hian vawiin chawhma khan SSA leh RMSA Champhai District tangkawp buatsahin Champhai Kahrawt Community Hall-ah hun hman a ni a. Champhai DC Pu Vanlalngaihsaka IAS chuan khuallian niin he hun hi a hmanpui a. Kumin atana thupui thlan chu ‘Transformation towards sustainable and resilient Society for all’ tih a ni.
Champhai DC Pu Vanlalngaihsaka chuan pianphunga rualbanlo ten an chanvo dik tak leh dikna an vawn him zel theih nana thawh chu thil tih makmawh a ni, a ti a. Khawvel changkang leh hmasawn ruala hma an sawn ve zel theih nana thawh chhunzawm zel a tul thu a sawi a. Khawvel ram intelkhawmna UN Assembly chuan kum 1992 Assembly-ah Rualbanlote Ni, International Day for Disabilities hi pawmin kum tina hman turin thutlukna a siam anih thu a sawi a. Heng bakah hian UN Assembly member 193 awmna September Ni 15, 2015 thu khawm chuan khawvel ram nuam zawk, sik leh sa tha, mitin huapzo hmasawnna ‘Sustainable Development 2030’ a duang chhuak a; chung zinga tum bulpui 17 zingah chuan Vohbikte/ Rualbanlote tan ruahmanna siam a tel a ni, a ti a. Vohbikte Ni hmang tura kalkhawmte chu Vohbik te chanvo leh dikna humhallh anih theih nana thawk theuh turin a sawm nghal a ni.
Programme hi Pu C.Hualrikhuma,Dy. DPC, RMSA, Champhai District-in kaihruaiin kalkhawmte lawmna thu a sawi a. Pi Lalrengpuii, IE(Inclusive Education) Coordinator RMSA, Champhai District-in vohbikte tana RMSA hmalakna a tarlanga. Pi H.Laltlansangi, IE Coordinator SSA, Champhai District-in vohbikte tana SSA hmalakna report a pe a. Pi K. Lalsiamliani DPC, SSA Champhai District-in lawm thu sawiin hun a khar a ni. Rualbanlo/ vohbikte hnenah khuallian in thilpek hlanna a nei a. Mal zai leh vohbikte atanga special itemte neih a ni a. Programme zawh hnu hian rualbanlote tan intihhlimna Special Olympics / outdoor games Kahrawt Field-ah buatsaih niin hun hlimawm tak hman a ni.
RMSA Champhai District hnuaia Inclusive Education (IE) ah hian Vohbik zirlai 130 awm mekin an tan hian allowances, hamthatna dang leh harsatna sut kian nan puihna hrang hrangte pek an ni thin a. NGO, vohbikte nu leh pa leh khawtlang tan Awareness Campaign-te neih thin a ni bawk. SSA Champhai District hnuaia Inclusive Education-ah hian vohbik zirlai 438 awm mekin sikul thleng phalo tan Home based Education; Ngur, Vapar, Lamzawl, Bungzung, Ngopa leh Champhaiah te kalpui a ni a. Govt Vengthlang Primary School, Champhai bulah Resource Room siam niin he hmunaha hian Exercise leh Physiotherapy-te tih sak thin an ni bawk a ni. Kum 2016 chhung khan mit thalote tan tarmit 220 pek a ni a, kumin bikah chuan mi 30 te hnenah tarmit pek an ni. Kal theilote tan Wheelchair-te pawh pek an ni a. Medical Assesment Camp-te pawh neih a lo ni tawh thin bawk a ni.
Kum 2011 Chhiarpuia chhinchhiah dan chuan Mizoramah rualbanlo 15,160 an awm a ni.
