Vawiin chawhma dar 10:00 khan Chief Secretary, Pu Lalmalsawma, IAS chuan C.S Conference Hall-ah leave application online a thehluhna tur ‘e-Leave Application’ chu hman theih turin a hawng.
Pu Malsawma chuan he ‘e-Leave Application’ hi Mizoram sawrkar flagship programme New Economic Development Policy (NEDP) hnuaia Administrative Reforms Committee rawtna zulzuia siam niin a bul tan nan Mizoram sawrkar a Secretaries te, District Administration (i.e DC Office leh Civil Sub Division), Rural Development Blocks leh Mizoram House a thawk IAS leh MCS Officers ten online a leave chi hrang hrang awlsam taka an dil zung zung theihna tura siam a ni. He application hi department hrang hranga officers leh staff te pawhin an hman theih tura tih len zel tum a nih thu a sawi.
Chief Secretary chuan he ‘e-Leave Application’ hi Department of Personnel & Administrative Reforms (DP&AR) leh Mizoram State e-Governance Society (MSeGS) tangkawpin an siam niin www.e-leave.mizoram.gov.in ah hman theih a dah a ni. He internet portal bakah hian ‘e-Leave Application’ mobile app pawh siam niin a duh apiang tan Google playstore ah download theihin dah a ni bawk. He ‘e-Leave Application’ in a huam officers te hian a chunga website tarlanah hian lutin self registration lo tih ve tur a ni a, Secretaaries leh DC te erawh registration tih zawh tawh a ni thung.
He ‘e-Leave Application’ hmang hian hmun kilkhawr leh State pawna officers ten leave dilna lehkha a hranga ziah ngai tawh lovin online in computer emaw mobile app emaw hmangin awlsam takin leave dilna an thehlut zung zung thei dawn a, sawrkar lam pawhin a hun takah leave hi a sanction zung zung in a tul hunah chuan charge lo la tu tur officer dang pawh rang takin a siam thei tawh dawn a ni. Tun hmaa leave dilna process hun rei tak ngai thin kha tihtawi niin hmun kilkhawr zawk a awm officers te leave dilna a hun takah sanction hman loh avanga sawrkar inrelbawlna a harsatna thleng thin leh mipui te tan pawha officer charge lo la tu tur ruat loh vanga harsatna awm thin te pawh sutkian theih beisei a ni.
Hawnna inkhawm hi Pi Ramdinliani, Jt. Secretary, DP&AR in kaihruaiin he hun hi Pu Vanlalchhuanga, IAAS Secretary, ICT leh Dr. C. Vanlalramsanga, IES, Secretary, Planning leh officer dang ten an hmanpui a ni.
