Anti Tobacco Squad, Champhai chu vawiin khan DC Conference Hall-ah an chairman Pu Vanlalngaihsaka, IAS, Champhai DC hovin kumin May ni 31-a World No Tobacco Day hman dan tur an relin an thukhawm.

DC Pu Vanlalngaihsaka chuan World No Tobacco Day hi World Health Organisation hmalakna khawvel puma hman thin a nih thu leh, Mizoramah pawh kumin hian District tina hmang turin State Nodal Officer (Tobacco Control) hnen atanga hriattirna dawn a nih thu a tarlang a. Hemi hnu hian Champhai District-a World No Tobacco Day hman dan tur relin, Govt. Champhai College Seminar Hall-ah hun hman nise an ti a. Programme hman dan tur kimchang an duang nghal bawk. Hemi rual hian Anti Tobacco Squad, Champhai ten health warning awm lohna meizial an man khawm sate chu tihral tura an tih bakah, squad drive neih nise an ti a ni. Vawiin thutkhawmah hian working member secretary atan Pu Lalthamawia Bolchhim chu an ruat nghal bawk.

Kumin World No Tobacco Day thupui chu "Plain Packaging" tih a ni a. Anti Tobacco Squad Champhai hian COTPA section 7-nain a tarlan angin vaihlo atanga thilsiam reng rengah vaukhanna thu a lem nen a awm vek tur a ni a. Heng vaukhanna thu hi vaihlo tuamna bawm hmalam lenzawng 40% tal a awh tur a ni a. He dan zawm famkimlo foreign atanga lo kal cigarette chi hrang hrang leh vaihlo atanga thilsiam reng reng zawrh leh hralh, siamchhuah leh semdarh khap tlat a ni a. He Dan bawhchhetu chu COTPA 2003 Section 20-na hmangin kum 2 atanga kum 5 thleng lungin tan emaw, pawisa Rs. 3000 atanga Rs. 10,000 thleng chawitir emaw a pahnih in emaw hrem theih an ni.