New Delhi a cham mek Chief Minister Pu Lal Thanhawla chuan vawiin khan Union Home Minister Pu Rajnath Singh chu a office ah hmuin tunhnaia Myanmara a zin thute a hrilh a. Chief Minister chuan India leh Asia Chhimchhak ramte nen Myanmar ram kaltlanga inkalpawhna mumal tak siam tha a tih thu leh hemi atana Kaladan Multi Modal Transit Transport Project thawh mek te chak leh zuala kalpui anih theinan hma la turin a ngen a. Hei hian Mizoram ramria insumdawn tawnna a tihpuitlin theih bakah Myanmar ram hausakna India in a hlawkpui theihna tura hma la turin Pu Hawla hian Home Minister hi a ngen bawk a ni.

Inkawmnaah hian Pu Lal Thanhawla chuan Myanmar ramri depah Assam Rifles hnathawhte chu fakawm a tih thu Home Minister hi hrilhin, changtlung zawka ramri ven hna kalpui a nih theihna turin ramri venna senso, Security Related Expenditure chu Mizoramah hman ve theih nise tiin a thlen bawk a ni. Home Minister Pu Rajnath chuan Pu Hawla thil thlen te chu a pawimawh tih sawiin, Home Ministry in alo enzuipui tur thu a hrilh nghal bawk a ni.

Chief Minister hian Home Minister chu hun remchangah Mizoram rawn tlawh tura sawm bawkin, Pu Rajnath Singh chuan Mizoram rawn zin ngei a tum thuin a chhang nghal a ni.