Vawiin chawhnu khan Information &Public Relations Minister Pu Lal Thanzara chuan I&PR Conference Hall-ah a vawikhatna atan Prominent Press Representative nihna chu mi panga - Pu Lalbiakthanga Pachuau, Zoram Tlangau chanchinbu; Pu J.Lalthangliana, Mizo Arsi; Pu C.Lalkhawliana, Highlander; Pu C.Vulluaia, Harhna leh Pu S.Lalhmachhuana, Turnipui chanchinbu enkawl leh neitute hnenah a hlan.

Pu Lal Thanzara chuan sawrkarin Prominent Press Representative atan a thlanchhuah hmasak ber mi pangate lawmpuiin he ni hi chanchinbumite tana ni chhianchhiahtlak a ni, a ti a. Mizoram Press Accreditation Committee in ngun taka a ngaihtuah hnuin heng mi pangte hi chanchinbu an enkawlna kawnga a tha zawnga mi challang, filawr leh langsar nia a ngaih, lungsi taka a thlanchhuahte an ni, a ti. I&PR Minister chuan chanchinbumite fuihin Politics lama awn zawng neih hriat lutuka thuziak leh politics ruihchilhna thinlung pu chunga mite er rana thuziak ai chuan sawrkar a ni emaw, mimal an ni emaw, fak phu te faka, chawimawi phu te chawimawi hreh lo tur leh ram leh mipui rawngbawlna thinlung pua thu ziak thin zawk turin a chah a ni.

Mizoram Press Accreditation Committee Chairman leh I&PR Secretary ni bawk Pu B.Lalthanliana chuan Prominent Press Representative Conferment function hi a kaihruai a. Mizoram Press Accreditation Rules, 2014 tlawhchhana Prominent Press Representative hmasa ber thlan an nih dan a sawifiah. Pu B.Lalthanliana chuan heng mi pangate hi Mizoram tan journalism hna kum tam tak rim tak leh tangkai taka thawktu an ni tih sawrkarin a hriatpuia, dam chhung atan accredited journalist niin Mizoram sawrkarin accredited journalist-te tana hamthatna a siam te an chhawr reng thei tawh dawn a ni, a ti.

I&PR Director Pu Jim K.Chozah pawhin chanchinbumi an nihna anga mipui rawngbawltu, an thawhpuite tana tangkai leh thawhhlawk, Mizoram chhunga journalism hmasawnna atana mi inpe te an ni tiin Prominent Press Representative pangate lawmpuina thu a sawi a. MJA President Vanlalrema Vantawl pawhin media lama sulsutu, ram buai lai pawha chawl lova chanchinbu kaltlangpui thei khawpa huaisen an ni, a ti a. Mizoram sawrkarin I&PR Department kaltlanga hriatpuina a pe chu lawmawm tiin journalism piah lamah art, music, social work leh politics a mi challang thiau thlan chhuah an ni hian journalist-te thlen san theihzia a tilang, a ti bawk.

I&PR Deputy Director Pi Lallianpuii’n Prominent Press Representative mi pangate chanchin tawi a sawi zawh hnuin I&PR Minister hian citation leh identity card a hlan a. Prominent Press Representative pangaten thu tawi an sawi bakah MJA Vice President Pu Zonunsanga Khiangte pawhin lawmpuina thu a sawi a. I&PR Jt. Director Pi Lalnithangi’n lawmthu sawiin hun hnung a khar a ni.