3464/2023-2024

Champhai the 24th January, 2024 – Republic Day, 2024 puala Chess Tournament buatsaih 2nd DC Trophy Chess Championship chu vawiin chawhma khan Champhai DC Pu James Lalrinchhana’n Vanlallawma Indoor Stadium (VANIS), Kahrawt Champhai ah a hawng.

Champhai DC Pu James Lalrinchhana chuan nikum lamah DC Trophy Chess Tournament hmasa ber hlawhtling taka neih alo nih hnuah a tum hnihna huaihawt leh theih ani chu lawmawm a tih thu sawiin Champhai District Chess Association (CDCA) hruaitute leh players lo tel zawng zawngte chungah lawmthu a sawi a. Champhai District-ah hmasawnna daih rei leh tlo a awm theihna turin zirna, faina, hriselna leh sports lama hmasawn chu thil pawimawh hmasa berte an nih thu a sawi a. Chess game khel turin rilru leh taksa hrisel neih a tul thu leh inthununna tha tak leh nun kawng hrisel vawn a pawimawh thu pawh sawiin, DC Trophy Chess Championship chuan thalaite rilru leh an hriselna ah te nghawng tha tak a neih ngei a beisei thu a sawi a.

Champhai District-ah chess game chawilar zel a pawimawh thu sawiin, ruihhlo leh hun awl hman that loh nain thalaite a tih buai mek karah rilru leh taksa hriselna pe theitu chess game ngaihven tura hnuhluh a tul thu sawiin, 2nd DC Trophy Chess Championship huaihawt tu te leh players chhuak zawng zawngte chu duhsakna a hlan a ni.

2nd DC Trophy Chess Championship hawnna inkhawm hi Pu J. Lalmuankima, President CDCA in a kaihruai a, Pu Vanlalsangpuia, Senior Vice President CDCA chuan Keynote address a sawi bawk a ni.

2nd DC Trophy Chess Championship hi Champhai District Chess Association (CDCA) leh Champhai DC Office te tangkawp buatsaih niin, ni hnih chhung (24th – 25th January, 2024) awh tur a ni a. He tournament ah hian mi 24 (mipa – 23 leh hmeichhia -1) telin, 1st Prize – Rs.7000/-, 2nd Prize – Rs. 5000/-, 3rd Prize – Rs. 3000/-, 4th Prize – Rs.2000/-, 5th Prize – Rs. 1000/- leh 6th – 10th Prize – Rs.500/- te ruahman a ni a. Lawmman pakhatna atanga pathumna te hi Republic Day 2024 lawmna program, Chhangphut Field ah sem an ni ang.