3465/2023-2024

2024 Pawlkut thla ni 24: Vawiin khan Kolasib District Deputy Commissioner (Bawrhsap) Pu John LT Sanga hovin DC Conference Hall-ah Prime Minister's Awards for Exellence in Public Administration, 2023 chungchangah thut khawm buatsaih a ni.

Bawrhsap Pu John LT Sanga chuan sawrkar hma lakna kalpui kawngah line department-te'n theih tawp chhuahin, a tha thei ang berin hna an thawk thin tih sawiin, ram leh mipui pawhin an sawtpui hle thin tih a sawi a. Chu'ng hma lakna leh hlawhtlinna chhuanawm tak tak chu mipuite hriata puanzar te, sawrkar hotute beng thleng tura hma lak te a pawimawh tih sawiin, sawrkarin hna thawk thate chawimawina leh lawmman chi hrang hrang a ruahman thinte chu dawng ve thei turin mahni hna thawhte huaisen taka tar lan ve thin a pawimawh a ni, a ti a. Line department kal khawmte chu PM Awards Scheme, 2023 hnuaia lawmman dawng thei turin dilna theh lut theuh turin a chah a ni.

He hunah hian PM Awards Scheme, 2023-in a huam sector hrang hranga line department hotute an kal khawm a. He Scheme nihphung leh dil thei tura thil tul hrang hrangte sawi ho a ni a. Line department hrang hrangte'n an hma lakna leh hlawhtlinnate chu tha tak leh felfai taka ziak chhuakin, hun tiam ral hma, January ni 31, 2024 hmain portal-ah dilna theh luh theuh tum ni se, tih a ni.

PM Awards Scheme, 2023 hi sawrkar hma lakna hrang hrang kengkawhtu department-te inkara inelna thianghlim a awm a, chumi kal tlanga hmasawnna chak leh tlo zawk a awm theih nan te, ram chhung hmun hrang hranga tih danphung tha leh hma lakna tha bikte pho chhuah a, hmun danga chhawm chhawn a nih theih nan te sawrkar laipui Ministry of Personnel, Public Grievances & Pensions hnuaia ruahman a ni a. Category pahnih awmin, category 1-ah sector pawimawh bik 12 (Har Ghar Jal, PMAY, PMJAY, PMMVY, KCC, etc.)-a district chhunga hma laknaa hma sawnna huap zo leh huam kim a awm dan atanga teha lawmman siam tur a ni a. Category 2-ah chuan sawrkar laipui ministry/department, state leh district te hma laknaa tih danphung tha leh tharlam, hmun danga chhawm chhawn tlak thlan tur a ni thung a. Scheme hian April ni 1, 2021 leh January ni 31, 2024 inkara hna thawh leh hlawhtlinnate a huam ang a. Dilna hi portal - pmawatds.gov.in kal tlangin DC login ID hmanga theh luh tur a ni.