No.2347/2021-2022

Aizawl, the 27th September, 2021: Mizoram Youth Commission (MYC), Sub-Hqrs. MHIP, Medhavi Foundation leh District Skill Committee tangkawp buatsaih Cake siam inzirtirna Cake Baking Training chu vawiin chawhma khan Champhai District Bawrhsap Pi Maria C.T Zuali chuan Circuit House Conference Hall, Champhaiah a hawng.

Pi Maria C.T Zuali chuan thalai ten eizawnna ngelnghet leh thiam thil an neih theihna tura inzirtirna tur project Mizoram Youth Commission hnena thehluhte pawm a nih avanga cake siam inzirtirna kalpui theih a nih thu sawiin, cake siam thiamte atanga district miten cake siam dan mahni khaw hmun ngeia an zir thei tur chu a lawmpui thu a sawi a. Hnathawh chu inhremna anga ngai lo tur leh kuthnathawh zahpui lova eng hna pawh hlawhtling pui thei tura nuam ti taka phur taka thawk thin tura fuihin, mahni tan mai nilo midangte zirtir chhawng thei khawpa thiam bel tum turin a chah a ni.

Bawrhsap chuan cake siam bakah food processing inzirtirna kalpui thuai tum a nih thu sawiin, khawl leh thiamna hmanga ei leh in sawngbawl kawngah hmasawnna nei tura tanlak a ni, a ti a. Cake siam zir tura inziaklut zawng zawngte mahni intodelh nan leh eizawn nana hmang thei tura theihtawp chhuah tura duhsakna hlanin training a hawng a ni.

Thusawitu dang Pi Lalhlimthangi Khiangte, President, Sub-Hqrs. MHIP, Champhai chuan MHIP member cake siam dan zirturte a lawmpui thu sawiin, tumruhna leh taimakna nena tih takzeta training tum turin a chah a. Ral thei lo thiamna zir chhuaka eizawn nana hmang thei tura tanla theuh turin a chah nghal bawk.

He hun hi Pu Obed Lalmalsawma, SDC chuan kaihhruaiin kalkhawmte lawmna thu a sawi a. Training tur hian cake siam lama tuimi MHIP member mi 22 te an inziaklut a ni.

Attachment

  • Loading attachment...