No.2348/2021-2022

Aizawl, the 27th September, 2021: Vawiin khan Lunglei Sanitation Task Force chu an Chairman Pu Kulothungan A, Deputy Commissioner kahhruaiin Lunglei DC Conference Hall-ah an thukhawm. UD&PA Department buatsaih ‘Mizoram Khawpui Fai Inelna-2021’ atana Lunglei District inpuahchah dan tur leh Cleanliness Week – 2021 leh Azadi Ka Amrit Mahotsav hman dan tur an rel.

Lunglei Sanitation Task Force Committee-ah hian Member Secretary Lunglei DUDO Pi Vanthangpuii leh a thawhpuite bakah department hrang hrang official-te leh Lunglei town area VC-te, MJA, YMA leh tlawmngai pawl dang aiawhte an tel a ni.

Meeting kaihruaitu Lunglei DC Pu Kulothungan A chuan Lunglei Sanitation Task Force Committee chu khawpui faina leh thianghlimna ah thuneihna sang tak nei a nih thu tarlangin Lunglei District-in faina kawnga hma a sawn zel theihnan Task Force member-te chu theihtawp chhuah theuh turin a chah a. ‘Mizoram Khawpui Fai Inelna-2020’ ah Lunglei in lawmman sang ber pahnih kan dawn - ‘Overall Cleanest Town’ leh ‘1st Rank for District Headquarter’ te kan nihna humhima Mizorama fai ber dinhmun luah chhunzawm tura theihtawp chhuah turin kalkhawmte thawhho puiah a sawm.

Cleanliness Week – 2021 hman dan tur tlangpui chu hetiang hi a ni. Cleanliness Week – 2021 hawnna inkhawm chu 02/10/2021 (Saturday) ah Convention Centre ah neih a ni anga. Covid-19 hrileng avangin mipui tam tak a inkohkhawm theih dawnloh avangin Lunglei Sanitation Task Force Committee member-te bakah sawm bik dang mi tlem te nen hawnna program hi hman ni se tih a rel a ni. October ni 4 ah VC ten mipuite hnenah Cleanliness Week hman mek a nih thu puangzarin faina leh thianghlimna kawnga hma la thar theuh turin fuihna leh ngenna mahni VC huamchhung theuhah a tam thei ang ber leh a darhzau thei ang bera neih tum a ni. October ni 5 ah hian chhung tin te mahni in leh a vel tihfai theuh tura ngen an ni a. October ni 6-ah khawtlang hruaitu ten vengchhung tihfai hnatlang (voluntary) huaihawt tur a ni a. ‘A hmunlo a bawlhhlawh paihtute ngaihhnathiamloh Ni (No Tolerance Day for Waste Disposal)’ ah hman tur a ni. October ni 7-ah Sawrkar pisa leh hmunhma te tih faina ni atan hman tur niin October ni 8 ah Cleanliness Week kharna hun hman tur a ni. Cleanliness Week 2021 a hmalakna (thlalak) te hi social media hrang hrang - Twitter, WhatsApp, Facebook leh Instagram ah te upload tum a ni.

Meeting-ah hian Azadi Ka Amrit Mahotsav hnuaia UD&PA Department kaltlanga hmalak dan tur te pawh sawiho a ni a . Azadi Ka Amrit Mahotsav Lunglei District Local Ambassador atan Mizo Gospel singer Nula Pensy B Lalthangliani ruat a ni a. September ni 29 ah hian Self Help Group leh sanitation worker-ten bawlhhlawh sawngbawl leh thliar chungchang inzirtirna mobile campaign an nei dawn a. September ni 30 ah faina kaihhnawih application (Digital monitoring app) hman dan inzirtirna buatsaih a ni dawn a. October ni 1 atang hian VC te faina kawnga intihsiakna buatsaih tum niin Bawlhhlawh thliar hrang tha ber veng, Faina inzirtirna leh hmalakna kalpui tha ber veng leh Vendors/hawkers te zinga plastic/polythene bag hman tlem chungchanga ti tha ber veng te thlanchhuah an ni ang. Hemi bakah hian Waste to Art exhibition buatsaih tum niin October ni 2-ah hian Sanitation Workers te zinga hna thawk tha (mipa leh hmeichhia) thlanchhuah an ni anga, lawmman pawisa fai leh certificate hlan tur an ni. He lawmman semna program hi Cleanliness week 2021 Opening program nen a in nang dawn avangin Best Sanitation Workers Lawmman hi Cleanliness Week Opening program ah hlan tura ruahmanna siam a ni. Print media leh media dang kaltlangin mipui zirtirna leh awareness campaign hrang hrang kalpui tum a ni bawk.