Vawin khan Champhai Town Hall-ah Directorate of SCERT leh DEO Champhai tangkawp chuan zirlai naupangte tan Career Conference an buatsaih a, he hunah hi Champhai DC Pu Zoengsanga chuan a hmanpui a ni.
Khuallian Pu Zoengsanga chuan zirlai naupangte tana thil tangkai tak Career Conference buatsaihtu Directorate of SCERT leh DEO Champhai te chu lawmthu hrilhin, zirlai naupangte chu nakin hun lawka Mizoram innghahna tur an nih avangin vawiina an thil zir chu an hma huna kaihruaitu tangkai taka hmang turin leh, khawtlang, ram leh kohhranin a mi chhawr leh hman tlak ni turin lehkha zir hunlai chuan taima taka zir turin a chah a. Tunlai khawvelah miin hna a vang tiin sawi mahse, a thiam te tan chuan hna thawh tur a awm reng thu sawiin, hna hmu tlaka thiam a tul tawh thu Khuallian chuan a sawi a. Zirtirtute pawhin zirlai ringawt zirtir lova, an zirlaite'n an zirna kawnga an mamawh tur te kan thlirpui thiam tur a ni ti bawk.
Vawiin Career Conference hi Pu RL Thianghlima, Principal DIET Champhai chuan a kaihruai a, thusawiin zirlai naupang kalkhawmte chu hetiang hun an hmang thei chu an vannei a tih thu leh, conference chu an zirzawm zelna atan an hman tangkai a beisei thu a sawi a ni.
He hunah hian Powerpoint presentation hmangin Pi Caroline Zoramthangi, VGO, SCERT, B Lalsangpuii AVGO SCERT, Lalremsangi Councellor SCERT leh Lalrindiki Ralte Psychologist SCERT ten zirlai kalkhawmte zirtirna an pe a. Champhai khawpui chhunga zirlai te an kal thahnem hle a ni.
