Vawiin chawhnu dar 1:00 khan Serchhip DLAO’s Conference Hall-ah UD&PA buatsaih SJSRY kaltlanga BPL member Furniture Workshop, Handicrafts leh Puan Thui (Tailoring) zir chhuak te hnenah Certificate leh an hmanraw mamawh te hlan an ni a, he inkhawm hi District Bawrhsap Pi Juhi Mukherjee, IAS chuan khuallian niin a hmanpui.

District Bawrhsap chuan Training chhuakte fuihna thu sawiin mahni kutkawih ngeia eizawnna nghet neih tuma thahnemngai taka an zirchhuah avangin lawmpuina thu a hrilh nghal a, an zirtirtute pawh lawmthu hrilhin an hnuaia zirchhuakte hlawhtlinna leh thlen chin apiang chu an hlawhtlinna ani ve zel tih a hrilh a, Training chhuak ten an mamawh bungrua an dawn nghal avangin hna an tan nghal thei a, Sawrkarin a tih tur chanpual a hlen tawh avangin anmahni pawhin an mawhphurhna an hlen ve ngei a ngai a, hlawhtlinna chu anmahni kutah liau liau a innghat tawh ani a ti a, midang tana malsawmna thlentu ni turin duhsakna a hlan bawk a ni.

Vawiin inkhawm kaihruaitu Pu ST Lalhmingmawia, DPO (SJSRY) chuan SJSRY hnuaia BPL Training hi Serchhip ah kum 2011 atang kum tin buatsaih a nih thu a sawi a, kumin ah Training 93 awmin; kum 2011-2014 chhungin mi 249 in Training hi an zo tawh a ni.

Training Centre atan hian Furniture Workshop 5, Tailorong Centre 4 leh Handicraft zirna 1, an vaiin Training Centre 10 thlanchhuah a ni a, hengah te hian Trainee te an tuina ang zawnga sem darh an ni.

Trainee ten thla tina an stipend dawn tur Rs. 500/- chu Department in khawl sakin an training chhuah rual a an chhawr zui theih tur puanthui khawl (sewing machine), Design Machine leh Electronic Randa a lei sak a, hengte hi vawiin hian trainee te hnenah hlan nghal an ni.