No.2313/2021-2022
Aizawl, 23rd September, 2021 : Mizoram Youth Commission (MYC), State Institute for Rural Development and Panchayati Raj (SIRD & PR) Mizoram leh District Skill Committee, Chanmphai District tangkawp buatsaih ni 45 awh tur Cement Mistiri Training chu vawiin chawhma khan Champhai District Bawrhsap Pi Maria C.T Zuali chuan Gosen Home, Champhai Zote-ah a hawng.

Pi Maria C.T Zuali chuan MYC, SIRD&PR leh District Skill Committee tangkawpin Gosen Home a awmte tana thiamthil zirna hun remchang tak an buatsaih chu lawmawm a tih thu sawiin, home a awmte nun kaihruai thei tur hawi zawnga hmalakna chu phurawm a tih thu a sawi a. Khua leh tui tha, chhawrnahawm leh hmantlaka an chhuah theih nana beihpui chu District Bawrhsap a nih anga a mawhphurhna a nih thu sawiin, tawngkaa inhrilhfiahna bakah a taka thawh theih turte pawh training chhungin ngaihtuahpui zel an nih tur thu a sawi a. Hmathlir leh beiseina neih a pawimawh thu sawiin, thiam thil inzirtirna atangin intunnun leh intodelh kawngah hma a sawn theih dawn a ni, a ti bawk.

Taimakna leh thawhrimnain thil danga rilru pawtpeng tur hun leh hmun a siam loh mai bakah ruihhlo leh suahsualna kawng dang zawh tur nasa taka a ven theih thu sawiin, inenkawlbikna hmuna awmte chu ngawl veina inbawih tir mai lova beileta talchhuah tum tura theihtawp chhuah tur leh, hemi laka chhanchhuak tura thiamthil zirtir kalpui tur chu uluk taka ngaihven theuh turin a chah a. Cement Mistiri Training kaltlanga thiamthil an zirte nakin zel atana eizawnna tlak leh chhungkaw innghahna tling mai bakah, kutchhuak belhchian dawl leh tlo nei thei tura ngaihtuahna seng turin a fuih a. Hun tha leh hlawkthlak tak hmang theuh tura duhsakna hlanin Cement Mistiri Training a hawng a ni.

He hun hi Pu Obed Lalmalsawma, SDC chuan kaihruaiin kalkhawmte lawmna thu a sawi a. Pu C.Lalthlansanga, Core Faculty (RE/H&N), SIRD&PR Mizoram hnen atangin training neih a nih chhan leh kalpui dan turte ngaihthlak a ni bawk.

Mizoram Youth Commission (MYC), State Institute for Rural Development and Panchayati Raj (SIRD & PR) Mizoram leh District Skill Committee, Chanmphai District tangkawp buatsaih Cement Mistiri Training hi ni 45 awh tur niin, training a tel tur hian Gosen Home-a awm mi 40 te thlanchhuah an ni a. Training chhung hian SIRD &PR Mizoram leh local partner Studio Hamlet, Champhai ten Cement Mistiri ni thei tura pawimawh hrang hrangte theory leh practical class neihpuiin an zirtir thin dawn a ni.