1486/2023-2024

Champhai the 14th August, 2023 – Vawiin khan Gandhi Memorial Higher Secondary School (GMHSS), Champhai chuan an Annual Sports Closing function Kahrawt Community Hall-ah an hmang a, Champhai DC Pu James Lalrinchhana chuan khuallian niin a hmanpui a ni.

GMHSS Annual Sports Closing Function-ah hian Costume Parade, Chheih Lam, Western Dance, Karate, Solo leh Instrumental Music item te neih niin hun hlimawm tak hman ho a ni a. Hnam Puanzar Zar beihpui Har Ghar Tiranga pualin zirlai kalkhawmte hian National Pledge of India an sawiho a ni.

Champhai DC Pu James Lalrinchhana chuan Champhai District-a Zirna In hlun leh tha berte zinga mi Gandhi Memorial Higher Secondary School (GMHSS) Annual Sports Closing function ah a tel thei chu lawmawm tiin zirlaite leh zirtirtute chungah lawmthu a sawi a. Annual Sports program an hman chuan an zirna leh an nunah nghawng tha tak a neih ngei a rin thu sawiin zirlaite chu an thiamna leh theihna te an hman tangkai theihnan an taksa leh rilru hriselna enkawl tha turin a chah a. An zirlai textbook mai piah lamah tawng dang zir te, music zir te, lehkhabu tha chhiar thin te ching tura fuihin zirlaite chu an ko a mawhphuhrna awmte tling leh tha taka hlenchhuak thin mi ni turin mahni a inrintawkna leh taimakna nei turin a chah a. School kan kal laia kan thiante leh kan zirtirtute hi kan nun kawnga mi pawimawh berte zing ami an ni tiin an hmalam hun lo kal zel turah an thian tha te leh zirtirtute ngai pawimawh chhunzawm zel turin a chah bawk a ni.

Vawiin program-ah hian Pi C. Lalmuanpuii, Principal GMHSS chuan thu sawiin, Pu Vanlalfela, Secretary, Games & Sports in report a pe a, Pu Lalthantluanga Tochhawng, Chairman Games & Sports in lawmthu sawina hun a hmang a ni.