1487/2023-2024

Mamit 14th August, 2023 : Vawiin khan Samagra Shiksha hnuaia Netaji Subhash Chandra Bose Awasiya Vidhyalaya (NSCBAV) Secondary Girls Hostel, Mamit chu Er. H.Lalzirliana, Bialtu MLA & Vice Chairman, Roads & Infrastructure Development Board chuan a hawng.

Er. H.Lalzirliana chuan Mamit District-in zirna kawnga hmasawnna hmel kan hmuh theih nana bungthar kai a ni ta chu a lawmawm hle a ni a ti a. Mamit District chu zirna kawngah kan hnufual thin hle a, Aspirational District hiala thlan kan ni. Heng hi a chhan chu zirna kawngah leh hriselna kawnga tehfung hrang hrangah kan nih tur kan phak loh vang a ni a ti. District mipuite chu kan rilru, ngaihtuahna dik neiha tumna sang tak nen District hmasawn tak ni zel tura tan kan lak a tul hle a ni a ti.

Bialtu MLA chuan Girls Hostel enkawltu tur mithiam tak tak mahni khawtual mi ngei kan nei chu a lawmawm lehzual hle a, nu leh pate'n inchungah rinna nasa tak an neih avangin theihtawp inchhuah a tul dawn a, mahni mihringpuite chunga kan duty tha taka hlenchhuah hi Pathian lawm zawng tak a nih avangin, naupangte entawn tlaka nun hmang a, rawngbawlna rilru pu chunga naupangte enkawl turin thawktute chu a chah bawk a ni.

Pu H. Lalrosanga, Dy. DPC (S) Samagra Shiksha, Mamit chuan report pe-in Girls Hostel Mamit-ah hian Seat 30 awmin Mamit High School atangin mi 10 leh Higher Secondary School atangin mi 20, an vaiin naupang 30 an awm dawn a. Thawktu, Warden - 1, Full time Accountant - 1, Head Cook - 1, Asst. Cook - Mipa leh Hmeichhia - 1 ve ve, Support Staff cum Peon - 1, Night Guard - 1 an vaiin mi 7 an thawk a ni. Mizoram Sawrkar hmalakna zarah Mamit District-in zirna kawngah hma a sawn hle a, Primary School, Middle School leh High School hawn thar tur kan nei nual chu a lawmawm hle a ni a ti bawk.

He hun hi Pu Laldingliana DEO/DPC chuan kaihruaiin Pu H. Darhmingliana Dy.DPC (E) chuan lawmthusawina a nei bawk a ni.