1487/2023-2024

2023 Thlazing ni 14: Vawiin khan Lawngtlai District Level Task Force on Ruihhlo Do chu an Chairman, Lawngtlai Bawrhsap Pu H. Lalhmingthanga hovin Lawngtlai DC Conference Hall-ah an ṭhu khawm.

Chairman Pu H. Lalhmingthanga chuan ruihhlo chu a titu nun tichhetu leh nun titawitu a nih bakah, chhungkua leh khawtlang nun hona boruak tichhia a, ram leh hnam hmel tibaltu a nih avangin a huatthlala tak zet tih a sawi a. Sawrkar pawhin ruihhlo do ngai pawimawhin, State leh District Level Task Force hial a din tih sawiin, department hrang hrang, tlawmngai pawl, kohhran leh khawtlang mipuite’n pheikhai rual takin ruihhlo do kawnga hma lak a ṭul a ni, a ti.

He ṭhut khawm hi August ni 16, 2023-a Social Welfare Minister Er Lalrinawma hova Lawngtlai DC Conference Hall-a District Level Task Force on Ruihhlo Do hma lakna review meeting buatsaih tur atana inhmakhua nana koh a ni a. Lawngtlai District Police, Excise & Narcotics Department leh Central Young Lai Association te hnen aṭangin Lawngtlai District chhunga ruihhlo dona kawnga an hmalakna report ngaihthlak a ni a. Ruihhlo zawrh tihtlem (supply reduction), hman khawloh tihtlem (demand reduction) leh chhiatna a thlen tihtlem (harm reduction) kawnga hma lakna hrang hrang leh hmachhawp awmte sawi ho a ni bawk.

District Level Task Force on Ruihhlo Do hi Mizoram Sawrkara Social Welfare Department hma laknain August ni 1, 2022 khan din a ni a. Ruihhlo dona kawnga kawngkal neia hma lak a nih theih nan department hrang hrangte 'Action Plan' siam zulzuiin Lawngtlai 'District Action Plan' ruahman a ni a. District chhung khaw hrang hrangah Village Level Task Force on Ruihhlo Do din a ni bawk a. A kaihhnawih department-te'n mahni hma zawnah theih tawp chhuaha hma lain, sikul leh kohhran hun hmannaah te ruihhlo ṭhat lohzia inzirtirna buatsaih ṭhin a ni a. Police, Excise leh CYLA Drugs Reduction Squad te'n ruihhlo hman khawlohna veng turin khawlai leh kawmkarah te duty-in hma an la reng a ni.