1489/2023-2024\

Serchhip, the 14th August, 2023 : Vawiin khan Serchhip DC Pu David Lalthantluanga hovin Serchhip Government High School ah Meri Maati Mera Desh hun hman a ni a. He hun hi India ram pumah neih niin India ram zalenna champhaphak vawi 75na lawmna kal zel tlipna leh kharna a ni a. Ram chhung dung leh vangah August ni 9 atang khan hman tan a ni.

Serchhip DC Pu David Lalthantluanga chuan kalkhawmte chibai bukin Meri Maati Mera Desh chu sawrkar laipuiin a ngai pawimawh hle a, India ram zalenna champhaphak vawi 75-na lawmna kal zelah a peng pawimawh tak leh kharna a ni, a ti a. India ram zalenna lawmin ram chhung dung leh vangah kumpui lingletin programme hrang hrang buatsaih a ni a, vawiin programme bik hi India ram leilung nena inzawm tlat kan nihna te, he ram tana an theihna hlantu mihuaisen te chawimawina ni atan te buatsaih a ni, a ti. He ram zalenna atana nun hlantute an hlu em em a, thangtharte hian kan ngaih hlut a, kan chawimawi an phu, DC chuan a ti a, an hniakhnung zuia ram hmasawnna atana an theihna hlan turin mipuite a sawm a ni.

Addl DC Pu James Lalnithanga chuan report pe in March 2021 atanga bultan, Meri Maati Mera Desh hun an hman chu Azadi ka Amrit Mahotsav lawmna kal zela peng pawimawh a ni a. Ram pumah a kharna hun inang tlanga hman tura ruat niin Serchhipah pawh urhsun takin hman a nih thu a sawi a ni.

He hun kaihhruaitu DRDO Project Director Pu HD Lalpekmawia pawhin program hman chhan leh a kalphung a tarlang a. Thutiam Panch Pran Pran Pledge chham rual niin SDO (Sadar) Pi Rebecca Laldinmawii Hrahsel chuan a kaihruai a ni.

Ram tana nun hlantu sipai pali - Pc lalrinmawia, RFN; Joseph Rothangpuia, RFN; Jerusalemthara, RFN leh Biakrotluanga, Constable lungphun chu DC Pu David Lalthantluanga chuan a hawng nghal a. Hemi zawh hian Sipai Tlangah Vasudha Vandhan hun hman niin thingtiak 75 phun a ni.